Otandyq Shoqan kiim brendi qoǵamda qyzý talqyǵa túsken «Borat» beinesi qoldanylǵan jarnamasyna qatysty resmi málimdeme jasady. Buǵan deiin áleýmettik jeli qoldanýshylary jarnamany ult namysyna tietin, qazaq halqyn kelemejdeitin kontent dep baǵalap, brendti qatań synǵa alǵan edi, dep habarlaidy ult.kz.
Qoǵamdaǵy narazylyqtan keiin kompaniianyń negizin qalaýshy Ulyqbek Sháripov daýly videony áleýmettik jeliden alyp tastap, bolǵan jaǵdaiǵa bailanysty pikir bildirdi. Onyń aitýynsha, jarnama arzan tanymaldyqqa jetý úshin túsirilmegen jáne qazaq halqynyń mádenieti men ulttyq qundylyqtaryn qorlaý maqsatyn kózdemegen.
Sonymen qatar, kompaniia ókilderi ózderiniń áleýmettik jobalaryn da atap ótti. Olar mektep ashyp, áleýmettik jaǵdaiy tómen otbasylardyń balalaryna granttar bólip júrgenderin aityp, aldaǵy ýaqytta qazaq tilindegi sapaly kontentti kóbeitýge kúsh salatyndaryn jetkizdi.
Degenmen, bul málimdeme qoǵamdaǵy pikirtalasty toqtata almady. Bir top jurtshylyq qateligin moiyndaǵan brendke ekinshi múmkindik berý kerek dep eseptese, endi biri ulttyq qundylyqtardy qorlaǵannan keiin qaiyrymdylyq isterin alǵa tartý orynsyz ekenin aityp, syn aitty. Brendke qatysty daý áleýmettik jelilerde áli de qyzý talqylanyp jatyr.
Borat – britandyq akter ári komik Sacha Baron Cohen oilap tapqan oidan shyǵarylǵan keiipker. Ol alǵash ret 2000 jyldardyń basynda teleshoýlarda paida bolyp, keiin eki filmniń basty keiipkerine ainaldy.
Keiipker ózin Qazaqstannan kelgen jýrnalist retinde tanystyrady. Alaida onyń obrazy Qazaqstannyń shynaiy mádenieti men halqyn kórsetpeidi. Kerisinshe, ol ádeii ásirelengen, saýatsyz, oǵash ári kúlkili beine retinde jasalǵan. Filmde Qazaqstan týraly kóptegen jalǵan ári kelemej sipattaǵy kórinister kórsetilgen.
2006 jyly shyqqan Borat: Cultural Learnings of America for Make Benefit Glorious Nation of Kazakhstan filmi úlken daý týdyrdy. Qazaqstan biligi bul film eldiń bedeline nuqsan keltiredi dep málimdegen bolatyn. Keiingi jyldary bul keiipkerge qatysty kózqaras ózgergenimen, kóptegen qazaqstandyqtar úshin «Borat» áli kúnge deiin ulttyq namysqa tietin obraz retinde qabyldanady.
Sondyqtan Shoqan brendiniń jarnamasynda osy keiipkerdiń beinesine uqsas obrazdyń qoldanylýy áleýmettik jelilerde synǵa ushyrap, jurtshylyq ony qazaqtardy mazaq etýge uqsata qabyldady. Al brend ókilderi mundai niet bolmaǵanyn aityp, jarnamany alyp tastap, keshirim surady.
