Búgin Almaty oblysy Shamalǵan aýylynda áleýmettik áljýaz toptar sanatyndaǵy otbasylar men múgedek jandar jańadan salynǵan jeke turǵyn úilerdiń kiltterine ie boldy. Bul jeke turǵyn úilerdi «Týǵan jer» jobasyna orai metsenat azamat turmys qajytqan otbasylaryna járdem retinde óz jeke qarjysyna turǵyzǵan. Bul týraly Almaty oblysy ákimdiginiń resmi saity habarlady.
Turǵyn úi kiltterin osy úilerdi óz qarajatyna salǵan «BN INVEST» qarjylyq-óndiristik kompaniiasy» JShS prezidenti Bolat Nazarbaev tabystady.
Qonys ielerine Shamalǵan aýlynyń turǵyny Myrzabek aqsaqal bata berdi. Sondai-aq Almaty oblysynyń ákimi Amandyq Batalov quttyqtady.
Turǵyn úige qol jetkizgen azamattardyń biri, múgedek jan Raqym Saǵyndyqov «Mundai igilikti isti atqarǵan azamattarǵa aitar alǵysymyz sheksiz. Týǵan jerin túletý, muqtaj jandarǵa qol ushyn berý – úlgi alarlyq is, úlken júrekti adamnyń ǵana qolynan keletin jomarttyq», - dedi óz pikirin bildirip.
Jalpy bul úiler Shamalǵan aýyldyq okrýginde turatyn áleýmettik áljýaz toptar sanatyndaǵy otbasylarǵa berildi.
Shamalǵan aýylynda ornalasqan bul 17 turǵyn úidiń qurylysyna 124,5 mln. teńgege jýyq qarajat jumsalǵan. Budan bólek injenerlik júilermen qamtýǵa ketken qarjynyń ózi 35 mln. teńgeden asady. Biylǵy jyldyń sáýir aiynda bastalǵan qurylys jumystary nebary 5 aidyń ishinde tolyǵymen aiaqtalyp, kóptiń igiligine usynylyp otyr. Ortalyqtandyrylǵan gaz, sý júielerine qosylyp, elektrmen qamtamasyz etilgen ár úidiń aýmaǵy 120 sharshy metrdi quraidy.
Aita keterligi, atalmysh turǵyn úilerge sý júiesin júrgizý barysynda igi istiń sharapaty ózgelerge de tiip, qurylysqa jaqyn ornalasqan taǵy 75 úi de ortalyqtandyrylǵan sý júiesine metsenat esebinen qosylǵan.
