Belgili qoǵam qairatkeri jáne kásipker Bolat Ábilov áleýmettik jelidegi paraqshasynda burynǵy «Qazatomónerkásip» ulttyq kompaniiasynyń basshysy Muhtar Jákishevtiń qyzy Altynaidy otaý qurýymen quttyqtap, jazba jariialady, dep habarlaidy ult.kz.
Ábilovtiń aitýynsha, Altynaidyń tańdaýy Karl esimdi Ulybritaniiada birneshe urpaqtan beri turatyn nigeriialyq otbasynyń ókiline túsken. Ol Karlmen birneshe jyl buryn tanysqanyn jáne onyń belsendi, sportty súietin, ómirde óz ornyn tapqan azamat ekenin atap ótti.
«Eń bastysy, onyń bizdiń Altynaiǵa degen yqylasy men qarym-qatynasy anyq baiqalady. Al ata-analar men jaqyndary úshin bul árqashan eń mańyzdy nárse», – dep jazdy Bolat Ábilov.
Ol Keńes Odaǵy taraǵannan keiin qazaqstandyq jastar úshin álemniń esigi ashylǵanyn, olardyń shetelde bilim alyp, jumys istep, saiahattap, óz taǵdyryn ózderi qalyptastyryp jatqanyn aitty. Onyń pikirinshe, mahabbat ultqa nemese týǵan jerge qaramaidy.
«Mahabbat ultty da, týǵan eldi de suramaidy. Ol bar nemese joq. Eki baqytty jasty kórgen kezde qalǵanynyń bári mańyzdy bolmai qalady», – dedi ol.
Ábilov Altynaidyń Londonda turyp, eńbek etip jatqanyn, modeldik mansabynda tabysqa jetip, kásibiligi men eńbeginiń arqasynda tanylǵanyn erekshe atap ótti.
Sondai-aq ol bul kúnniń tek Altynai úshin ǵana emes, onyń ata-anasy Muhtar men Jámila Jákishevter úshin de qýanyshty ári tolǵanysqa toly sát ekenin aitty.
Bolat Ábilov jas jubailarǵa uzaq ǵumyr, ózara syilastyq, danalyq, berik otbasy jáne jyldar ótken saiyn nyǵaia túsetin shynaiy mahabbat tiledi.
