Bilim jáne ǵylym ministrligi «Bolashaq» baǵdarlamasy boiynsha Qytaida oqyp jatqan stýdentterdiń máselesin sheshti, dep habarlaidy "Ult aqparat" vedomstvonyń baspasóz qyzmetine silteme jasap.
Koronavirýsqa bailanysty elde júrgen «Bolashaq» halyqaralyq baǵdarlamasynyń stýdentterine oqý eliniń bekitilgen normativi boiynsha júrip-turýǵa jáne tamaqtanýǵa arnalǵan ai saiynǵy soma tólene beredi. QR Bilim jáne ǵylym ministrligi halyqaralyq yntymaqtastyq departamentiniń direktory Erkebulan Boranbaev osylai dep málimdedi.
Onyń aitýynsha, ótken aptada stýdentterge kómek kórsetý úshin tiisti buiryqqa ózgeris pen tolyqtyrý engizý týraly sheshim qabyldanǵan.
Sheshim qabyldanǵannan keiin Erkebulan Boranbaev Qytaida bilim alyp jatqan halyqaralyq «Bolashaq» baǵdarlamasynyń stipendiattarymen kezdesip, erejeler stýdentterdiń paidasyna qarai ózgergenin túsindirdi.
«Shynymen de, qazir koronavirýs qaýpinen Qytaidan Qazaqstanǵa kelgen jeti stýdent bar. Biz olarmen turaqty bailanystamyz, birneshe kezdesý ótkizdik jáne ministrdiń buiryǵyna ózgeris engiziletinin túsindirdik. JOO-dan oqý protsesin bastaý nemese jalǵastyrý týraly resmi habarlama alǵannan keiin oqý eline qaitatyn aviabiletterdi satyp alý josparlanyp otyr. Fors-majorlyq jaǵdailar týyndaǵan jaǵdaida stipendiia tolyq kólemde tólenedi degen sheshim bir apta buryn qabyldandy», - dedi Erkebulan Boranbaev.
Dúlei apattar, áskeri áreketter, shektemeler, epidemiia jáne basqa da tótenshe oqiǵalar eńserilmeitin jaǵdai bolyp sanalatynyn aita ketken jón.
