Bokstan Tokio Olimpiadasyna irikteý ainalymynyń Parijde uiymdastyrylýy tiis finaldyq kezeńi ótkizilmeidi, dep habarlaidy olympic.kz.
Halyqaralyq Olimpiada komiteti mundai sheshimdi qabyldaýyna sportshylardyń densaýlyǵy men qaýipsizdigin saqtaý máselesi sebep bolǵan. HOK koronavirýsty infektsiiaǵa qatysty álemdegi ahýaldy eskere otyryp, aimaqtyq irikteý týrnirlerinen bólek joldamany reiting arqyly úlestirýdi jón sanady.
«Biz barshańyzdyń bokstan Tokio-2020 Olimpiadasyna irikteý týrnirlerin ótkizýge qosqan úlesińizdi joǵary baǵalaimyz. Bul jolda bizdiń basty basymdyǵymyz sportshylar bolǵany anyq. Osy oraida, HOK halyqaralyq jol qatynastary men álem elderindegi shekteýlerdi tolyǵymen zerttedi. Sońǵy on kún ishinde biz Ulttyq Olimpiadalyq komitettermen jáne federatsiialarmen, tehnikalyq, meditsinalyq mamandarmen, sondai-aq, boksshylarmen aqyldasa kele, bokstan Olimpiadaǵa irikteý týrniriniń josparyna ózgeris engizdik. Ózgeris engizý barysynda biz irikteý týrnirleriniń arasyndaǵy demalys ýaqytynyń kem degende 30 kúnge jetýin, boksshylardyń irikteý dodasyna, sondai-aq, Olimpiada oiyndaryna tiisti deńgeide daiyndalýyn basty mindetter qataryna qoidyq. Sonymen qatar, memleketter arasyndaǵy jol saparlaryna shekteýdiń enýi men karantin talaptarynyń ózgerýi sportshylardyń tiisti deńgeide daiyndalýyna kedergi keltiretini anyq boldy», - delingen habarlamada.
Osylaisha, 2021 jyldyń maýsymyna josparlanǵan Parijdegi álemdik irikteý týrniri ótkizilmeidi. Finaldyq irikteý synynda erler 32, áielder 21 joldamany sarapqa salýy tiis bolatyn. Endi atalǵan joldamalar olimpiadalyq salmaqtar boiynsha tórt qurlyqqa (Aziia/Okeaniia, Afrika, Eýropa, Amerika) teń bólinedi.
Bokstan Qazaqstan áielder komandasynyń enshisinde 75 kelige deiingi salmaqta Nadejda Riabets enshilegen jalǵyz joldama bar. Qazirgi sátte bokstan qyzdar komandasynyń ózge múshelerinde Olimpiadaǵa baratyn múmkindik az. Óitkeni, álemdik reitingide olardyń shekti mejeden ótý múmkindigi tómen kórsetilgen. Naqty sheshim aimaqtyq irikteý týrnirleri túgel aiaqtalǵan soń anyqtalmaq.
Búginge deiin Aziia/Okeaniia aimaǵy men Afrikadaǵy irikteý dodasy aiaqtaldy. Al qurlyqtyq básekeler Amerikada 10-16 mamyr aralyǵynda, al Eýropada maýsym aiynda ótedi dep boljanǵan.
Eske sala keteiik, Qazaqstan erler komandasy Iordaniianyń Amman qalasynda ótken aimaqtyq irikteý týrnirinde barlyq litsenziiaǵa qol jetkizdi. Tokio tórinde Sáken Bibosynov (52 keli), Serik Temirjanov (57 keli), Zákir Safiýllin (63 keli), Abylaihan Júsipov (69 keli), Ábilhan Amanqul (75 keli), Bekzad Nurdáýletov (81 keli), Vasilii Levit (91 keli), Qamshybek Qońqabaev (+91 keli) synǵa túsedi.
