Bokstan Qazaqstan chempionatynyń úshinshi kúni tartysty ótti. Sharshy alańǵa shyqqan boksshylar kelesi kezeńge ótý úshin aianyp qalǵan joq, dep habarlaidy "Ult aqparat".
El chempionatynyń tańerteńgi sessiiasynda 69 kelige deiingi salmaqta qyzdar arasyndaǵy jartylai finalǵa shyqqan boksshylar aiqyndaldy. Olimpiada júldegeri almatylyq Dariǵa Shákimova men qaraǵandylyq Jasmin Qizatova, elordalyq álem chempiony Valentina Halzova men jambyldyq Baljan Asqar atalǵan salmaqtaǵy bas júldeni sarapqa salatyn boldy.
Erler arasynda 52 jáne 57 kelige deiingi salmaqta jartylai finalǵa buǵan deiin qatarynan ozyq shyqqan boksshylar ilikti. Atap aitqanda, Mahmud Sabyrhan, Sáken Bibosynov, jarysty ary qarai jalǵastyrady. Sonymen birge olimpiadalyq litsenziiany ielengen pavlodarlyq Serik Temirjanov ta jekpe-jekti ýaqytynan buryn aiaqtap, kelesi kezeńge ótti.
63 kelige deiingi salmaqta jasyndai jarqyldap júrgen Zákir Safiýllin de búgingi synnan súringen joq. Ol da Olimpiada litsenziianyń iegeri.
Túrkistan oblysynan kelgen 25 jastaǵy boksshy Bekdáýlet Ibragimov el chempionatyndaǵy alǵashqy jekpe-jegin almatylyq Aitjan Áshirhanǵa qarsy ótkizdi. Kezdesý uzaqqa sozylǵan joq. 19 jastaǵy Aitjannyń qabaǵy jyrylyp ketip, aiqasty toqtatýǵa týra keldi. Ibragimov jartylai finalda almatylyq Dilmurat Mijitovpen qolǵap túiistiredi. Mijitov ta qarsylasyn eki ret nokdaýnǵa jiberip, myqtylyǵyn dáleldedi.
Álem chempionattarynyń finalisi, Tokio Olimpiadasynyń litsenshiiasyn alǵan Ábilhan Amanqul 75 kelige deiingi salmaqta merziminen buryn taǵy bir aiqasty aiaqtady. Onyń qarsylasy qaraǵandylyq Ersultan Sovetov alǵashqy raýndta-aq eki nokdaýn aldy. Ekinshi raýndtan keiingi nokdaýnnan soń tóreshi aiqasty toqtatyp tastady. Ábilhan kelesi kezekte 21 jastaǵy túrkistandyq boksshy Bekzat Sabyrmen ózara myqtyny anyqtaidy. Óz kezeginde Bekzat birinshi raýndta aýyr nokaýtqa ushyratty. Bul salmaqta bas júldeden 15 jyldyq tájiribesi bar Erik Áljanovtyń da talasy bar.
Eske salaiyq, bokstan Qazaqstan chempionaty Shymkent qalasynda ótip jatyr.
