Elorda aýmaǵynda «HI-TECH» jedel aldyn alý sharasy ótip jatyr, dep habarlaidy "Ult aqparat".
Nur-Sultan qalalyq politsiia departamentiniń málimetinshe, sharanyń alǵashqy kúninde quqyq qorǵaýshylar 8 kiberqylmysty áshkerelep, olarǵa qatysy bar 7 adamdy ustady.
Máselen, 12 qazanda elorda turǵyny politsiiaǵa júginip, belgisiz bireýdiń «Elektrondy úkimet» portaly arqyly páterine bógde adamdardy tirkep qoiatyndyǵyna shaǵym túsirdi. Osydan keiin aqparattyq júiege zańsyz aralasý faktisi boiynsha sotqa deiingi tergeý amaldary bastaldy.
IP-mekenjaimen jedel izdeý sharalary barysynda politsiia qyzmetkerleri shaǵymdanýshynyń akkaýntyna zańsyz kirip, aqshalai syiaqyǵa azamattardy tirkep otyrǵan 21 jastaǵy jumyssyz jigitti ustady. Kúdiktiden qylmystyq áreketin júzege asyrǵan kompiýter tárkilendi.
«Sonymen qatar bank kartasynan aqsha urlaý kúdigimen elordanyń 29 jáne 34 jastaǵy turǵyndary ustaldy. Kúdiktiler túrli syltaýmen tanystarynyń bank kartalarynyń rekvizitterin alyp, internet-banking arqyly aqshalaryn urlaǵan. Urlanǵan aqshasomasy 385 myń teńgeni quraidy. Kúdiktiler barlyq qarajatty sporttyq báseke tigip jibergen. Ustalǵandarǵa qatysty QR Qylmystyq kodeksi 188-baby 2-tarmaǵy boiynsha 2 qylmystyq is tergelip jatyr», - dep atap ótedi departamentten.
Munan bólek, politsiia qyzmetkerleri áleýmettik jeli arqyly tanysqan jigittiń atynan zańsyz onlain nesie rásimdegen 19 jastaǵy boijetkendi qolǵa túsirdi. Kúdikti zardap shegýshini aldap, onyń jeke málimetterin alǵannan keiin internet arqyly 150 myń teńge nesie rásimdegen. Sodan keiin akkaýntyn óshirip tastaǵan. Shaǵymdanýshy kredit jaiynda kollektor qońyraý shalǵanda ǵana bilip, politsiia kómegine júgingen.
Sondai-aq elorda aýmaǵynda avtorlyq jáne aralas quqyqty buzǵany, arnaýly tehnikalyq quraldardy satqany jáne pornografiialyq materialdardy taratqany úshin 3 adam ustaldy. Atalǵan faktiler boiynsha QR Qylmystyq kodeksiniń 198, 399 jáne 311-baptarymen sotqa deiingi tergeý júrgizilip jatyr. Qajetti saraptamalar taǵaiyndaldy.
