«Top Rank» promoýterlik kompaniiasynyń basshysy Bob Arým qazaqstandyq boksshy Jánibek Álimhanulynyń (5-0, 2 KO) bolashaǵynan zor úmit kútedi, dep habarlaidy Sports.kz portaly.
- Men Álimhanulynyń Gennadii Golovkinniń izbasary bolatynyna senemin, ol da Qazaqstannan. Jánibek - keremet boksshy jáne ony juma kúni keshkisin kóre alasyzdar, - dedi Arým 26 jastaǵy qazaqstandyq boksshynyń kezekti jekpe-jegi aldynda.
Aldaǵy aiqasyn Jánibek Álimhanuly 13 sáýir kúni tańerteń Los-Anjelestegi Staples Center arenasynda (AQSh, Kaliforniia shtaty) ótkizedi. Qarsylasy - meksikalyq Kristian Olivas (16-4, 13 KO).
Bob Arým jaily aitar bolsaq, onyń negizgi klienti WBA Super jáne WBO nusqalary boiynsha jeńil salmaqtaǵy álem chempiony, ýkraindyq Vasilii Lomachenko (12-1, 9 KO). Ol bul keshte britandyq boksshy Entoni Krollomen (34-6-3, 13 KO) kezdesedi. Vasilii jeltoqsandaǵy divizionda biraýyzdan qabyldanǵan sheshim boiynsha Hose Pedrasýdy (25-2, 12 KO) jeńip, ekinshi belbeý iesi atanǵan bolatyn.
