Eýroodaqqa múshe elder Kiprdiń ustanymyna bailanysty Belarýs biligine sanktsiia sala almai otyr. Bul týraly Bloomberg agenttigi jazdy.
Basylymnyń habarlaýynsha, Kipr Jerorta teńizindegi qairańnyń daýly aýmaǵynda burǵylaý jumystaryn júrgizip jatqan jeti túrik kompaniiasyna shekteý qoimaiynsha, odaqtyń Belarýs biligine sanktsiia salý týraly ortaq sheshimin qoldaýdan bas tartatynyn aitqan.
Sonyń saldarynan EO Belarýs boiynsha ortaq kelisimge kele almai otyr: syrtqy saiasat boiynsha sheshimder qabyldaný úshin odaqqa múshe elderdiń barlyǵy sheshimdi qoldaýy tiis.
Sanktsiia boiynsha ortaq kelisimge kelý úshin Eýroodaq Túrkiiaǵa sanktsiia salý jumystaryn jedeldetýge májbúr bolǵan. Alaida bul másele boiynsha tehnikalyq kelissózder ótpegen, sáikesinshe Minskige qatysty shekteý sharalary da keiinge qalyp otyr. Bloomberg sóilesken diplomattar bul baǵyt boiynsha másele tek qyrkúiek aiynyń sońynda ǵana jyljýy múmkin dep boljaǵan.
Buǵan deiin nemistiń Die Welt basylymy Belarýs sheneýnikterine salynatyn sanktsiia paketi qyrkúiek aiynyń ortasynda daiyn bolýy tiis dep jazǵan edi. Basylymnyń málimetinshe, tizimge Belarýs prezidenti Aleksandr Lýkashenko enbegen. Ony engizýge Germaniia, Frantsiia, Italiia qarsy bolǵan. Lýkashenkonyń sanktsiia tizimine enbeitinin keiinirek Reuters de habarlady.
Buǵan deiin Baltyq elderi Belarýs sheneýnikterine (olardyń arasynda Lýkashenko da bar) sanktsiia salǵan.
