Prezident Qasym-Jomart Toqaev Almatyda qaza bolǵan politseilerdi marapattaý týraly jarlyqqa qol qoidy, dep habarlaidy Sputnik Qazaqstan Aqordaǵa silteme jasap.
"Qyzmettik boryshyn úlgili atqarǵany, quqyq tártibin qamtamasyz etýge belsene qatysqany úshin ishki ister ministrligi Almaty qalasynyń politsiia departamenti patrýldik politsiia polkiniń qyzmet inspektory Janǵaziev Jaras Sultanǵaliuly (marqum) II dárejeli "Aibyn" ordenimen, ishki ister ministrligi Almaty qalasynyń politsiia departamenti patrýldik politsiia polkiniń politseii Abdyqanov Dastan Maratjanuly (marqum) III dárejeli "Aibyn" ordenimen nagradtalsyn", - delingen prezident jarlyǵynda.
Jarlyq 2020 jyldyń 26 mamyrynan bastap kúshine endi.
Almaty blok beketindegi oqiǵa
25 mamyrda Kóksai shaǵyn aýdanyndaǵy Jańa ǵasyr men Qojabekov kósheleriniń qiylysyndaǵy №4 blok bekette BMW avtokóliginiń júrgizýshisi aldymen qorshaýǵa, sodan keiin eki politsei otyrǵan patrýldik kólikke soǵyldy.
42 jastaǵy politsei Jaras Janǵaziev oqiǵa ornynda qaza boldy. Al 26 jastaǵy ekinshi politsei Dastan Ábdiqanov aýrýhanada esin jimastan kóz jumdy. Oqiǵa saldarynan zardap shekken taǵy bir politsiia qyzmetkeri aýrýhanada aýyr halde jatyr.
Kináli azamattyń ishimdik ishkeni rastaldy. Ol buryn ishki ister organdarynda 6 jyl qyzmet etken Alataý aýdanynyń turǵyny bolyp shyqty.
Eki jáne odan da kóp adam óltirý faktisi boiynsha 1992 jyly týǵan er adamǵa qatysty qylmystyq kodekstiń 99-babynyń 2-bóligi boiynsha sotqa deiingi tergeý bastaldy (bul bap boiynsha 15 jyldan 20 jylǵa deiingi merzimge nemese ómir boiyna bas bostandyǵynan aiyrý jazasy qarastyrylady).
