Foto: Instagram.com
Astanada Perizat Qairat pen onyń anasy Ǵaini Alashbaevaǵa qatysty atyshýly qylmystyq isti qaraý jalǵasýda. Eki kúdiktige qaiyrymdylyq úshin jinalǵan 3,5 milliard teńgeni iemdendi degen aiyp taǵylǵan, dep habarlaidy Ult.kz.
Sotta kýáger retinde tanymal bloger Oljas Sadyq jaýap berdi. Onyń aitýynsha, ol Gaza sektoryna gýmanitarlyq kómek kórsetý maqsatynda 83,5 mln teńge jinap, bul qarajatty Perizat Qairat basqaratyn qorǵa senip tapsyrǵan. Qarjy jinaý bastamasy 2023 jyldyń qazan aiynyń sońynda dosy Nazim Misanovpen birge Instagram jelisinde jariialanǵan videodan bastalǵan. Videony milliondaǵan adam kórip, nátijesinde blogerdiń jeke bank kartasyna qomaqty qarajat aýdarylǵan.
Bastapqyda Sadyq bul aqshany BUU-nyń IýNISEF uiymy arqyly joldaýdy josparlaǵan, alaida Perizat Qairat onymen bailanysqa shyǵyp, Palestina elshiligimen tikelei jumys júrgizip jatqanyn aitqan soń, bloger oǵan senip, qarajatty osy qorǵa aýdarǵan. Keiinnen olar birlesip Ábý-Dabige baryp, gýmanitarlyq qoimalarǵa da barǵan. Sadyqtyń aitýynsha, bul sapardyń barlyq shyǵynyn Perizat ózi ótegen.
Alaida elge oralǵannan keiin bloger kómek qarjysynyń naqty qaida ketkenin rastaityn qujattardy birneshe márte suraǵanymen, eshqandai jaýap ala almaǵanyn aitty. Sotta Oljas Sadyq aldaǵy ýaqytta tek resmi arnalar — IýNISEF sekildi uiymdar arqyly jumys isteitinin málimdedi.
Buǵan deiin «Asar-Úme» qorynyń basshysy Perizat Qairatqa 200 million teńge aýdarǵanyn jazǵanbyz.
