فوتو: Instagram.com
استانادا پەريزات قايرات پەن ونىڭ اناسى عايني الاشباەۆاعا قاتىستى اتىشۋلى قىلمىستىق ٸستٸ قاراۋ جالعاسۋدا. ەكٸ كٷدٸكتٸگە قايىرىمدىلىق ٷشٸن جينالعان 3,5 ميلليارد تەڭگەنٸ يەمدەندٸ دەگەن ايىپ تاعىلعان, دەپ حابارلايدى Ult.kz.
سوتتا كۋەگەر رەتٸندە تانىمال بلوگەر ولجاس سادىق جاۋاپ بەردٸ. ونىڭ ايتۋىنشا, ول گازا سەكتورىنا گۋمانيتارلىق كٶمەك كٶرسەتۋ ماقساتىندا 83,5 ملن تەڭگە جيناپ, بۇل قاراجاتتى پەريزات قايرات باسقاراتىن قورعا سەنٸپ تاپسىرعان. قارجى جيناۋ باستاماسى 2023 جىلدىڭ قازان ايىنىڭ سوڭىندا دوسى نازيم ميسانوۆپەن بٸرگە Instagram جەلٸسٸندە جارييالانعان ۆيدەودان باستالعان. ۆيدەونى ميلليونداعان ادام كٶرٸپ, نەتيجەسٸندە بلوگەردٸڭ جەكە بانك كارتاسىنا قوماقتى قاراجات اۋدارىلعان.
باستاپقىدا سادىق بۇل اقشانى بۇۇ-نىڭ يۋنيسەف ۇيىمى ارقىلى جولداۋدى جوسپارلاعان, الايدا پەريزات قايرات ونىمەن بايلانىسقا شىعىپ, پالەستينا ەلشٸلٸگٸمەن تٸكەلەي جۇمىس جٷرگٸزٸپ جاتقانىن ايتقان سوڭ, بلوگەر وعان سەنٸپ, قاراجاتتى وسى قورعا اۋدارعان. كەيٸننەن ولار بٸرلەسٸپ ەبۋ-دابيگە بارىپ, گۋمانيتارلىق قويمالارعا دا بارعان. سادىقتىڭ ايتۋىنشا, بۇل ساپاردىڭ بارلىق شىعىنىن پەريزات ٶزٸ ٶتەگەن.
الايدا ەلگە ورالعاننان كەيٸن بلوگەر كٶمەك قارجىسىنىڭ ناقتى قايدا كەتكەنٸن راستايتىن قۇجاتتاردى بٸرنەشە مەرتە سۇراعانىمەن, ەشقانداي جاۋاپ الا الماعانىن ايتتى. سوتتا ولجاس سادىق الداعى ۋاقىتتا تەك رەسمي ارنالار — يۋنيسەف سەكٸلدٸ ۇيىمدار ارقىلى جۇمىس ٸستەيتٸنٸن مەلٸمدەدٸ.
بۇعان دەيٸن «اسار-ٷمە» قورىنىڭ باسشىسى پەريزات قايراتقا 200 ميلليون تەڭگە اۋدارعانىن جازعانبىز.
