Qazaqstan Halyq Keńesiniń Tóraǵasy Erlan Qoshanov Batys Qazaqstan oblysyna jumys saparymen baryp, «Jańa qoǵamdyq etika: mádeniet, ádep, ádet» atty respýblikalyq forýmǵa qatysty. Bul – Prezident tapsyrmalaryn júzege asyrý aiasynda konstitýtsiialyq organnyń óńirlerde ótkizgen alǵashqy is-sharasy. Dialog alańynda myńnan astam qoǵam ókili, belsendi analar men sarapshylar bas qosty.
Aldymen Erlan Qoshanov Memleket basshysy Qasym-Jomart Toqaevtyń forým qatysýshylaryna arnalǵan quttyqtaý hatyn oqyp berdi.
Foto: Halyq Keńesi baspasóz qyzmetinen
Prezident respýblikalyq forýmynyń ashylýymen quttyqtap, Qazaqstan Halyq Keńesiniń uiymdastyrýymen ótkizilip jatqan alqaly jiyn ulttyq tárbie men qoǵamdyq mádeniettiń sabaqtastyǵyn dáripteitin mańyzdy is-shara ekenin atap ótti.
«Konstitýtsiia – elimizdiń ósip-órkendeýine jol ashatyn qasterli qujat ári halqymyzdyń jańa dáýirdegi bolmys-bitimin aiqyndaityn temirqazyq. Sondyqtan bárimizdiń aldymyzda turǵan asa mańyzdy maqsat – Konstitýtsiiamyzdyń basty qundylyqtary men mańyzyn halyq arasynda, ásirese, jastarǵa jan-jaqty túsindirip, keń aýqymda dáripteý. Óitkeni, qazirgidei qubylmaly, turaqsyz jáne kúrdeli ýaqytta memlekettigimizdiń myńdaǵan jyldyq tarihy men dástúrin jadymyzda saqtai otyryp, jurtymyzdyń boiyna ozyq oily ultqa tán igi qundylyqtardy sińirý asa ózekti mindet sanalady» – delingen quttyqtaýda.
Sonymen qatar Memleket basshysy órkenietti el bolý qasterli Otanymyzdyń múddesi úshin tutas qoǵam bolyp tabandy eńbek etýden bastalatynyna erekshe mán bergen. Sebebi, eńbekti qadirleitin qoǵamnyń azamattary ár iske zor jaýapkershilikpen, janashyr júrekpen jáne adal nietpen qaraityny sózsiz.
«Biz tutas qoǵam bolyp «Taza Qazaqstan» jalpyulttyq bastamasyn qolǵa aldyq. Búkil el boiynsha tazalyq is-sharalaryn júrgizip, osy qasietti uǵymnyń tereń maǵynasyn jurtymyzdyń, ásirese, jastarymyzdyń sanasyna sińire bastadyq. Osylaisha, tazalyq ult bolmysynyń ajyramas bóligine, halqymyzdyń myzǵymas qundylyǵyna ainalýda. Biz zań men tártip ústemdik quratyn, bilim men ǵylymǵa, innovatsiiaǵa basa mán beretin, birligi bekem, Ádiletti, Qaýipsiz, Kúshti ári Taza Qazaqstandy quryp jatyrmyz. Osy mańyzdy missiiany júzege asyrýǵa memlekettik mekemelermen qatar, tutas qoǵam, iaǵni ár otbasy, ár azamat, sondai-aq qoǵam belsendileri, ustazdar qaýymy jáne eriktiler kúsh biriktirip, belsene atsalysýy kerek. Búgingi basqosýda aitylatyn utymdy usynystar men tyń ideialar osy maqsat-mindetterdi iske asyrýǵa yqpal etedi dep senemin», – delingen Prezident quttyqtaýynda.
Erlan Qoshanov óz sózinde Memleket basshysy alǵa qoiǵan aýqymdy mindetterdi iske asyrýda Halyq Keńesiniń belsene atsalysatynyn atap ótti. Konstitýtsiialyq konsýltativtik organnyń basty missiiasy – jurtshylyqty Prezident reformalary men bastamalary tóńireginde toptastyrý.
«Búgingi áńgime – Otan men otbasy týraly áńgime, bolashaq týraly áńgime. Ádep pen ádet, qoǵamdyq etika arqyly ulttyń jańa sapasyn qalyptastyrý týraly keńes. Konstitýtsiiamen birge qoǵamnyń sana-sezimi men dúnietanymynda da tereń ári mańyzdy ózgerister oryn alyp jatyr. Prezident árbir qazaqstandyqtyń týǵan tilin qurmetteitin, salt-dástúrin saqtaityn, úlkendi syilap, bilimge umtylatyn, sonymen qatar álemge ashyq azamat bolǵanyn qalaidy. Osy qasietter otbasyndaǵy tárbieden bastalyp, «Zań men tártip», «Taza Qazaqstan», «Adal azamat» qaǵidattary arqyly qalyptasýy tiis», – dedi E. Qoshanov.
Halyq Keńesiniń Tóraǵasy Prezident Qasym-Jomart Toqaevtyń reformalary jeti jyl ishinde el ómirine eleýli ózgerister ákelgenin aitty. Jańa ekonomikalyq saiasat ekonomikany ártaraptandyrýǵa, áleýmettik ádildikti nyǵaitýǵa múmkindik berdi. Keiingi jeti jylda Qazaqstannyń ishki jalpy ónimi 181,7 mlrd dollardan 306 mlrd dollarǵa deiin ósti. Jan basyna shaqqandaǵy ishki jalpy ónim 9,8 myń dollardan 15 myń dollarǵa jetti. 25 myń shaqyrym jol salyndy. 1 300 jańa mektep boi kóterdi, «Keleshek mektepteri» jobasy aiasynda 217 mektep salyndy.
Prezident bastamasymen táýelsizdik jyldarynda buryn-sońdy bolmaǵan aýqymdy reformalar júzege asyryldy. Búginde Qazaqstan ekonomikalyq turǵyda da, áleýmettik, mádeni-rýhani turǵyda da damýdyń jańa kezeńine qadam basýda.
«Osy jańǵyrý úderisteriniń sharyqtaý shegi – jańa Halyq Konstitýtsiiasy. Onymen birge búginde adamdardyń júregi men sanasynda tereń ári mańyzdy ózgerister oryn alýda. Reformalar elimizdi búgin ózgertse, qundylyqtar onyń elý jyldan keiin qandai bolatynyn aiqyndaidy. Sondyqtan Prezident kúndelikti ómirdiń ajyramas bóligine ainalýǵa tiis qoǵamdyq qundylyqtar men baǵdarlardy júieli túrde qalyptastyryp keledi», – dedi Erlan Qoshanov.
Otyrys barysynda forým qatysýshylary tárbie máselesi, qoǵamdaǵy adamgershilik qundylyqtardyń róli, bilim berý jáne kitap oqý mádenietin damytý siiaqty birqatar mańyzdy máseleni ortaǵa saldy.
Qazaqstan Halyq Keńesiniń múshesi Natalia Dementeva áskeri bólimderdegi moraldy-turmystyq jaǵdailardy jaqsartý máselesin kóterdi.
Bul baǵyt Halyq Keńesiniń jumysy aiasynda odan ári jalǵasyn tabady. Áskeri bólimderdegi jaǵdaidy zerdelep, áskeri qyzmet ótkerýdi kezeń-kezeńimen jaqsartý sharalaryn aiqyndaý josparlanyp otyr.
Taǵy bir mańyzdy másele – jastardy jumyspen qamtý. «Jańa múmkindik» qoǵamdyq birlestiginiń jetekshisi Arman Túlkibaev suranysqa ie mamandyqtardy meńgerip, jumysqa ornalasýǵa kómektesetin «JOLTAP» jobasyn iske asyrý tájiribesimen bólisti. Osy tájiribeni keńinen qoldaný perspektivalaryna, sonyń ishinde aýyl jastarynyń kásibi bilim alyp, jumysqa ornalasý múmkindikterin keńeitýge mán berildi.
Kezdesý barysynda Halyq Keńesiniń múshesi, Respýblikalyq Analar alqasynyń tóraiymy Nazipa Shanai jáne Quryltai depýtaty Snejanna Imasheva men oblys basshylyǵy da sóz sóiledi.
Foto: Halyq Keńesi baspasóz qyzmetinen
Sonymen qatar «Nairi» QR armian mádeni ortalyqtarynyń qaýymdastyǵy» ZTB Analar alqasynyń tóraǵasy Tatiana Mýradian qoǵamdyq etika týraly sóz qozǵasa, «Túrkistan oblystyq ata-analar qaýymdastyǵy» qoǵamdyq birlestiginiń tóraǵasy Aqbaian Jakipova áielder quqyǵyn qorǵaý máselesin kóterdi. Al qoǵam qairatkeri, aýǵan etnomádeni birlestiginiń múshesi Anna Mohammad adal azamat týraly óz paiymymen bólisip, Amangeldi aýyldyq kitaphanasynyń meńgerýshisi Gúlsim Iskalieva kitap oqityn ult máselesin qozǵady.
Forým memleket pen qoǵam arasynda ashyq pikir almasý alańyna ainaldy. Alqaly jiyn qoǵamdyq qundylyqtardy nyǵaitýǵa, azamattyq jaýapkershilikti arttyrýǵa jáne qoǵamdyq ádepti qalyptastyrýǵa baǵyttalǵan el damýynyń strategiialyq baǵyttary men naqty bastamalardy ushtastyrdy.
