Qazir áleýmettik jelide bloger Bota Mianyń qyrǵyzstandyq balaǵa syilaǵan tulparynyń jabýy qyzý talqylanyp jatyr, dep habarlaidy ult.kz.
Biraq dál osyndai shý birneshe jyl buryn sheneýnikterdiń de basynan ótken.
Aita keteiik, Atyraý oblysy Qurmanǵazy aýdanynda 63 jastaǵy depýtattyń memlekettik týdyń beinesi bar jabyndy jabylǵan atqa mingen sáti áleýmettik jelide qyzý talqyǵa túsken. Kópshilik muny depýtat memlekettik týdy qorlap otyr dep qabyldap, áreketke narazylyq bildirdi.
Alaida aýdan ákimdigi bul jaǵdaiǵa qatysty túsinikteme berdi.
«Bul syilyq Qurmanǵazy aýdany Eńbekshi aýyldyq okrýgi turǵyndary men Ardagerler keńesi qoǵamdyq birlestigi atynan jasaldy. Týǵan kún iesine qurmet retinde atqa Qazaqstan Respýblikasynyń memlekettik týynyń elementteri beinelengen arnaiy jabyndy jabyldy. Atalǵan jabyndy zoodúkennen satyp alynǵanyn atap ótemiz», – dep málimdedi ákimdik.
Osylaisha, ákimdik atqa jabylǵan buiym memlekettik týdyń ózi emes, tek tý elementteri beinelengen arnaiy jabyndy ekenin túsindirgen bolatyn.
Dál sol siiaqty, Bota Mia da at ústindegi jabyndy memlekettik rámiz emes ekenin basa aitty.
«Attyń ústine jabylǵan dúnie memlekettik tý emes. Bul dúkende satylatyn, atqa arnalǵan arnaiy jamylǵy. Onda memlekettik týdyń beinesi joq, tek Qazaqstandy bildiretin kún men qyran elementteri ǵana qoldanylǵan, - dep jazdy bloger.
Ol zańgerlermen de aqyldasqanyn jetkizdi.
