1 shildede AQSh memlekettik hatshysy Entoni Blinken ózbek jáne tájik diplomattarymen Aýǵanstan máselesin talqylady, dep habarlaidy Azattyq.
AQSh pen NATO Aýǵanstannan áskerin shyǵaryp jatqan shaqta jáne Vashington Ortalyq Aziia elderinen odaqtas tabýǵa umtylyp jatqan tusta osyndai kezdesý ótip otyr. Keiingi aptalarda Taliban ondaǵan aýdandy basyp alyp, batys qoldaityn aýǵan úkimetiniń alańdaýshylyǵyn týǵyzǵan.
Taliban Aýǵanstannyń soltústiginde Ózbekstan men Tájikstanmen shektesetin birneshe aýdandy baqylaýǵa alyp, Ortalyq Aziia elderiniń shekarasyna jaqyndaǵan. Dýshanbe tálipterden qashqan aýǵandardy qabyldaýǵa daiyn ekenin málimdegen. Al Ózbekstan aýǵan-ózbek shekarasynda áskeri daiyndyqty pysyqtap, qaýipsizdikti kúsheitken.
"Aimaq qaýipsizdigi ásirese, Aýǵanstan máselesine kelgende bizdiń múddemiz ortaq" dedi Blinken Ózbekstan syrtqy ister ministri Abdýlaziz Kamilovpen kezdesýden keiin ótken brifing kezinde.
AQSh memlekettik departamentiniń taratqan habarlamasyna sáikes, Tájikstan syrtqy ister ministri Sirodjiddin Mýhriddinmen kezdesý kezinde Blinken Aýǵanstan máselesin talqylap, AQSh Tájikstannyń "qaýipsizdigi, turaqtylyǵy jáne territoriialyq tutastyǵyn qoldaidy" dep málimdegen.
Amerikanyń The New York Times jáne The Wall Street Journal basylymdary jáne ózge BAQ-tyń jazýynsha, AQSh biligi Taliban men "Ál-Qaida" ekstremistik toptarynyń áreketin baqylaý úshin Aýǵanstanǵa jaqyn Ózbekstan men Tájikstanda áskeriniń biraz bóligin ornalastyrýǵa kúsh salyp jatyr.
