Batys Qazaqstan oblysy orman sharýashylyǵy jáne janýarlar dúniesi aýmaqtyq inspektsiiasy kiikter sanynyń artýynan halyqtyń sharýashylyqtaryna kelip jatqan ziianǵa qatysty shaǵymdarǵa jaýap berdi, dep habarlaidy QazAqparat tilshisi.
BQO orman sharýashylyǵy jáne janýarlar dúniesi aýmaqtyq inspektsiiasynyń basshysy Qairat Qadeshevtiń aitýynsha, ótken jyly óńirde 135 myń kiik sanaqqa ilikse, biyl shamamen 200 myńǵa jýyqtady. Onyń naqty sany aldaǵy shilde aiynda anyqtalady.
Ótken mamyr aiynda kiikter jappai tóldep boldy.
Osy rette, Q.Qadeshev jekelegen buqaralyq aqparat quraldarynda jariialanǵan Qyzyl kitapqa engen atalmysh janýarlardyń sharýashylyq jerlerge zardabyn tigizip jatqany týraly habarlarǵa túsinik berdi.
«Biz kiikter shoǵyrlanǵan Qaztalov jáne Jánibek aýdandarynda bolyp keldik. Mysaly, Jánibek aýdanyndaǵy Talov pen Borsy aýyldarynyń aralyǵynda 60 myńdai kiik bar. Árine, turǵyndar tarapynan kiikter jerdi taptap tastady degen pikirler burynnan aitylyp júr. Buǵan aitarym, árkim óziniń jerine muqiiat bolýy kerek. Qorshap alsyn, iá bolmasa qoryqshy ustasyn. Basqalai ázir eshteńe istei almaimyz», - dedi Qairat Qadeshev.
Qazirgi tańda kiikter negizinen sýdyń qasynda, malmen birge de jaiylady. Baǵýsyz júrgen mal da az emes. Ekinshiden, kiikter alasa ósken shópti jeidi, shabyndyqqa ziianyn tigizedi dep aitý qiyn ári olar adam júretin jerge jaqyndamaidy.
Kiik memleket tarapynan qorǵalatyndyqtan, ony «Ohotzooprom» ÓB» RMQK-nyń inspektorlary kózden tasa qylmaidy. Qazirgi tańda qyryq shaqty inspektor tórt topqa bólinip, 8 avtokólikpen baqylap júr.
Mamandardyń aitýynsha, kiikter kúzge qarai Bókei ordasy, Jańaqala aýdandaryna qarai aýady. Erkin júretin janýardy bir jerde tizgindep ustaý múmkin emes.
«Máseleniń taǵy bir jaǵy bar. Ol - Bókeiorda rezervatyn qurýdy tezdetý. Sonda rezervat qorshalyp, kiikter sonyń ishinde júrer edi», - Q.Qadeshev.
