Batys Qazaqstan oblysy Shyńǵyrlaý aýdanynda joldy sý shaiyp ketkendikten, birneshe aýylmen qatynas úzildi, dep habarlaidy QazAqparat tilshisi.
Aýdan ákimdiginen túsken málimetke qaraǵanda, qardyń tez erýi saldarynan Shyńǵyrlaý-Aqshat-Segizsai jolynyń birneshe jerinen erigen sý jaiylyp, erneýinen asyp ketti.
Eldi mekenderge qaýip tónip turǵan joq. Jergilikti atqarýshy organdardyń kúshimen táýlik boiy kezekshilik uiymdastyryldy.
Joldy qalpyna keltirý jumystary erigen sý azaiǵannan keiin júrgiziletin bolady.
«Qazirgi ýaqytta ol aýyldarmen qatynas joq. Aýrý adamdar, júkti áielder qaýipsiz jerge jetkizildi. Aýyldarda azyq-túlik jetkilikti. Mal azyǵynan da tapshylyq joq. Bir-eki kúnge shydaidy dep oilaimyz», dedi aýdan ákimi Áliia Muhanbetjanova.
Eske sala keteiik, budan buryn Batys Qazaqstanda aýyl mektebine sý kirgenin, tasqyn sýdyń ótkeldi shaiyp ketkeni habarlanǵan.
Sondai-aq sý kirgen 25 úidiń adamdary basqa jaqqa kóshirildi.
BQO TJ departamentinen túsken málimetke qaraǵanda, vedomstvoda kóktemgi sý tasqynyna bailanysty jedel shtab jumys jasap jatyr. Jedel jeli nómiri – 8-711-2-55-40-88.
