Batys Qazaqstan oblysynda taǵy 6 meditsina qyzmetkerine koronavirýs juqqan. Bul týraly 1 mamyrda oblystyq jedel shtab ókilderi habarlady. Aimaqta barlyǵy 28 meditsina qyzmetkerinen koronavirýs tabylǵan. 152 adamǵa koronavirýs juqqan.
Oblystyq densaýlyq saqtaý basqarmasy qazir karantindik statsionarlar men provizorlarda tekserý jumystary júrip jatqanyn habarlady.
"Biz naýqastardy statsionarlarǵa oqshaýlaimyz. Bul aimaqta virýstyń jaiylýyna jol bermeidi. Alaida meditsina qyzmetkerlerine de virýs juǵyp jatyr. Koronavirýs - keibir adamdar oilaityndai ótirik nárse emes. Bul óte qaýipti aýrý jáne pnevmoniia nemese demigýge ainalmai turyp, ony erterek anyqtap alǵan durys" dedi oblystyq densaýlyq saqtaý basqarmasynyń basshysy Bolatbek Kaiýpov.
Buǵan deiin densaýlyq saqtaý ministrligi koronavirýspen kúresip jatqan dárigerlerdiń jalaqysyna 250-850 myń teńge aralyǵynda ústeme aqy qosylatynyn, kásibi mindetin atqarý kezinde koronavirýs juqqan dárigerlerge 2 mln teńge kóleminde saqtandyrý tólemi beriletinin aitqan.
Qazaqstanda júzdegen dárigerge koronavirýs juqqan. Olardyń basym bóligi - Almatyda. Bas sanitar dáriger Nur-Sultan men Shymkentte de meditsina qyzmetkerlerine virýs juqqanyn habarlaǵan.
Qazaqstanda barlyǵy 3556 adamnan koronavirýs tabylǵan. 25 adam qaitys bolǵan. 900-ge jýyq adam jazylǵan.
