Batys Qazaqstan oblysynda 30 sáýir kúngi málimet boiynsha koronavirýs juqtyrǵan 8 adam tirkeldi, dep habarlaidy "Ult aqparat".
BQO ákimdigi málim etkenindei, eki adamnyń biri – Reseide jumys jasaityn 29 jastaǵy oblys turǵyny, ekinshisi – sol eldiń joǵary oqý ornynda oqityn Shymkent qalasynyń 18 jastaǵy turǵyny.
Olar Reseimen shektesetin «Tasqala» jáne «Syrym» avtoótkelderinen ótken kezde densaýlyqtaryna shaǵymy bolmaǵan. Algoritmge sáikes jedel járdem shaqyrylyp, karantindik statsionarǵa jatqyzylǵan kezde aýrýǵa shaldyqqany anyqtaldy.
Qalǵan 6 adam – meditsina qyzmetkeri. Olardyń bári koronavirýs juqtyrý qaýpi joǵary meditsina qyzmetkeri retinde tekserilgen bolatyn.
Segiz naýqas ta oblystyq juqpaly aýrýlar aýrýhanasyna ornalastyryldy. Olarmen qarym-qatynasta bolǵan adamdar anyqtalyp, meditsinalyq baqylaýǵa alyndy.
Aýrý oshaqtarynda dezinfektsiialyq jumystar júrgizildi.
Osylaisha BQO-da aýyrǵandar sany 146-ǵa jetip, sonyń 9-y emdelip shyqty.
BQO taýarlar men kórsetiletin qyzmetter sapasy men qaýipsizdigin baqylaý departamentiniń basshysy Muhamǵali Aryspaev oblystyq juqpaly aýrýlar aýrýhanasy men karantindik statsionardaǵy dárigerler men medbikelerdiń úilerine barmai, jataqhana men qonaqúide jatyp, qyzmet atqaryp júrgenin, olardyń ár 14 kún saiyn saiyn skiringtik tekserýden ótkizilip jatqanyn jetkizdi.
«Sondai tekserý qorytyndysy nátijesinde sońǵy eki táýlikte 10 medbikeniń aýrý juqtyrǵany belgili boldy. Olarmen qarym-qatynasta bolǵan 11 meditsina qyzmetkeri karantindik statsionarǵa jatqyzyldy. Meditsina qyzmetkerleri aldaǵy ýaqytta da skiringtik tekserýden ótetin bolady», dedi M.Aryspaev.
Oblysta tirkelgen 146 naýqastyń 119-y nemese 86 paiyzy – deni Reseiden, sondai-aq Atyraý oblysynan kelgender, 26-sy – buryn aýyrǵandarmen bailanysta bolǵandar. Bir naýqastyń qaidan juqtyrǵany anyqtalý ústinde.
«Oblystyq juqpaly aýrýlar aýrýhanasynda emdelip jatqan naýqastardyń 80 paiyzy jeńil, qalǵan 20 paiyzy ortasha aýyr halde. 6 emdelýshide pnevmoniia bolǵanymen, tynys alýy qalypty», dedi oblystyq densaýlyq saqtaý basqarmasynyń basshysy Bolatbek Qaiýpov.
Eske sala keteiik, budan buryn BQO-da koronavirýs anyqtalǵan 11 naýqastyń jeteýi Túrkistan oblysynyń turǵyndary ekendigin jazǵan bolatynbyz.
