Batys Qazaqstan oblysynda sońǵy aptada koronavirýs juqtyrý deńgeii 44,2 paiyzǵa ósti, dep habarlaidy "Ult aqparat".
BQO sanitarlyq-epidemiologiialyq baqylaý departamentiniń basshysy Muhamǵali Aryspaevtyń óńirlik kommýnikatsiialar qyzmeti alańynda málim etkenindei, aldyńǵy aptada (15-21 qańtar) óńirde 353 adam koronavirýs juqtyrǵan bolatyn.
Sońǵy aptada (22-28 qańtar) bul kórsetkish 633-ke jetti. Keshe 104 adamnyń aýyrǵany anyqtaldy.
Jyl basynan beri oblysta 1561 adamnyń koronavirýs juqtyrǵany tirkeldi.
Ásirese, aýyrǵandar sany Oralda (717), Báiterek (324) jáne Bórli (209) aýdandarynda kóbeie túsýde.
Syrqattanǵandarmen bailanysta bolǵan 2040 adam zerttelip, meditsinalyq baqylaýǵa alyndy.
M.Aryspaevtyń sózine qaraǵanda, aýyrǵandardyń 707-si nemese 45 paiyzy – jumys isteitin adamdar, 290-y nemese 18 paiyzy – zeinetkerler.
«Sondai-aq 114 oqýshy, 72 muǵalim, 51 meditsina qyzmetkeri indetke shaldyqty. Koronavirýs juqtyrǵan meditsina qyzmetkerleriniń kópshiligi olardyń kásibi qyzmetine bailanysty emes. Oblysta 11 qańtarda bastalǵan úshinshi toqsannan beri 91 oqýshydan indet tabyldy. Qalalyq, aýdandyq bas memlekettik sanitar dárigerleriniń qaýlysyna sáikes oblys boiynsha barlyǵy 34 synyp karantinge jabyldy», dedi M.Aryspaev.
Onyń aitýynsha, Reseiden kelgender arasynan koronavirýstyń tabylýy jalǵasýda. Aitalyq, qańtar aiynda memlekettik shekaradan 20718 adam ótse, sonyń 4819-y – jolaýshylar. Anyqtamasy joq 597 jolaýshynyń úsheýinen kovid anyqtaldy. Halyqaralyq júk tasymalymen ainalysatyn 10474 júrgizýshiniń 4247-sinde anyqtama joq bolyp shyqty. Bulardyń beseýi indet juqtyrǵan.
Eske sala keteiik, budan buryn Oralda jeksenbi kúnderi qoǵamdyq kóliktiń júrmeitinin jazǵan bolatynbyz.
