Batys Qazaqstan oblysynda bir kúnde otyzdan astam saiajai úii janyp ketti, dep habarlaidy "Ult aqparat".
BQO TJ departamentiniń bastyǵy Jasulan Jumashevtiń málim etkenindei, oqiǵa keshe oryn aldy.
Oral qalasynda saǵat 12.33-te «Avtomobilist», «Armatýrshik», Báiterek aýdanynda «Iaik» saiajai seriktestikteri órtendi. Barlyǵy 40 gektar jer janyp, 31 saiajai úii (olardyń kóbi qaraýsyz qalǵan) men sharýashylyq qurylystary otqa orandy. Terekti aýdany Áitiev aýyly aýmaǵynda 25 ga jer janyp, órt búgin saǵat 08.10-da oqshaýlanyp, 10.53-te sóndirildi.
Saǵat 13.50-de Báiterek aýdany Ozernyi aýylynda 150 ga qurǵaq shóp, buta men orman alqaby órtendi. «Tilsiz jaý» búgin saǵat 11.01-de aýyzdyqtaldy. Sholpan eldi mekeninen Rýbejka aýylyna 30 adam evakýatsiialanyp, olar aǵaiyn-týystarynda panalap, búgin úilerine qaityp oraldy.
Sondai-aq keshe saǵat 13.45-te Syrym aýdany Jympity-Qosoba jolynda traktor tirkemesi men 6 tonna pishen janyp ketti. Órt 15.35-te sóndirildi.
Keshe saǵat 20.04-te Oral qalasy aýmaǵyndaǵy «Kóktem» saiajai seriktestigi, 109-ýchaskesinde saiajai úii (25 sharshy metr) órtenip, 21.30-da sóndirildi.
Sońǵy úsh kúnde Batys Qazaqstan oblysynda 45 (sonyń 32-si – qurǵaq shóp) janý oqiǵasy tirkeldi.
J.Jumashev tabiǵi órt saldarynan zardap shekken turǵyndar ótemaqy alý úshin BQO TJ departamentinen órt jónindegi aktiniń kóshirmesin alyp, sosyn jergilikti atqarýshy organdarǵa jolyqqannan keiin arnaiy komissiia qaraitynyn jetkizdi.
Eske sala keteiik, budan buryn BQO-da dalalyq jer men orman órtengenin jáne 21 tonna pishenniń janyp ketkenin jazǵan bolatynbyz.
