Gagarin dańǵylynyń boiyndaǵy turǵyndar sol mańda júrgiziletin qurylys nysanyna narazy. Jurtshylyq shaǵyn saiabaq aimaǵynyń ornyna jeke qurylys salýshynyń 13 qabatty turǵyn úi keshenin turǵyzýǵa sheshim qabyldaǵanyn aitty, dep habarlaidy "Ult aqparat".
Esep berý jiyn barysynda Gagarin dańǵylynyń turǵyndary Bostandyq aýdanynyń ákimi Altai Rahymbetovten «Komfort» jáne «Gagarin Park» turǵyn úi kesheniniń ortasyna 13 qabatty turǵyn úi salýǵa ruqsattyń bar-joǵyn surady. Olardyń aitýynsha, bul jerde saiabaq salý josparlanǵan. Qazir bul mańda qarapaiym jurtshylyq serýendeitin jer joq.
«Rasymen osy turǵyn úi keshenderiniń arasynda bos jer bar. Bul ýchaske jeke menshikke tiesili. Ol munda kópqabatty turǵyn úi salýǵa ótinish bildirdi. Osyǵan bailanysty biz bul máseleni sáýlet jáne qala qurylysyn baqylaý basqarmasymen birge qarap jatyrmyz. Áli de onda ne salýǵa bolatynyn aqyldasamyz. Eger qandai da bir sheshim qabyldanǵan jaǵdaida nysan barlyq qurylys talptaryna sáikes bolýy kerek. Sonymen qatar, turǵyndardyń múddesi eskeriledi», - dep jaýap berdi aýdan ákimi.
Ol Memleket basshysy men qala ákiminiń tapsyrmasy boiynsha ár nysandy salý máselesi muqiiat qaralatyndyǵyn atap ótti.
«Bul másele jan-jaqty zertteletin bolady. Naqty sheshimdi turǵyndarǵa jetkizetin bolamyz», - dedi Altai Rahymbetov.
