Batys Qazaqstan oblysynda koronavirýs juqtyryp, aýrýhanada jatqandar sany kóbeiip ketti, dep habarlaidy "Ult aqparat".
Oblystyq densaýlyq saqtaý basqarmasy basshysynyń orynbasary Gúlnár Ábdirahmanovanyń óńirlik kommýnikatsiialar qyzmeti alańynda ótken brifingide málim etkenindei, qazirgi tańda óńirde 333 tósektik alty juqpaly aýrýlar aýrýhanasynda 138 adam em alýda.
Jansaqtaý bóliminde jatqandar sany da artyp, 11 adamǵa jetti. Bulardyń bári de – 65 jastan asqandar. Indet olardyń sozylmaly syrqatyn asqyntyp jibergen. Jeteýi artenziialyq gipertenziiamen aýyrsa, tórteýinde qant diabeti bar. Meditsinalyq kómekke kesh júgingendikten, olardyń ómirine qaýip tónip tur.
Oblysta úsh adam ottegi kontsentratoryna qosylǵan.
Tórt karantindik statsionarda 41 adam jatyr.
Sondai-aq pnevmoniiaǵa shaldyqqan 149 adam emdelýde.
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń aitýynsha, óńirde epidemiologiialyq ahýal kún sanap nasharlap keledi.
Kúni búginge deiin oblysta 7142 adamnyń koronavirýs juqtyrǵany tirkeldi.
Qazan aiy bastalǵannan beri 161 adam dertke shaldyqsa, bulardyń 73-i (45,3 paiyzy) – zeinetkerler, 28-i (17,4 paiyzy) – jumyssyzdar, 29-y (18 paiyzy) – jumys isteitinder, 15-i (9 paiyzy) – meditsina qyzmetkerleri, 9-y (5,6) – muǵalimder men tárbieshiler, ekeýi (1,2 paiyzy) – balalar.
Tek sońǵy táýlikte 49 adamnyń indet juqtyrǵany anyqtalsa, sonyń 18-i zeinetkerler bolyp otyr.
N.Mustaevtyń sózine qaraǵanda, 6 qazan men 6 qarasha aralyǵynda shekaradan 18983 adam ótse, sonyń 4791-i – jolaýshylar. Osynyń ishinde anyqtamasy joq 931 adam karantindik statsionarǵa jatqyzylyp, 19-ynan indet tabyldy. Anyqtamasy joq 104 sheteldik azamat keri qaitaryldy.
Sol sekildi 26 qazannan beri shekaradan ótken 5897 júrgizýshiniń 1541-inde anyqtama bolǵan joq. 10 júrgizýshiden koronavirýs anyqtaldy.
Mamandardyń aitýynsha, indettiń taramaýy úshin turǵyndardyń ózderi densaýlyqtaryna jaýapkershilikpen qarap, sanitarlyq talaptardy buljytpai saqtaǵany abzal.
