Batys Qazaqstan oblysynda 1-16 qarasha aralyǵynda 503 adamnyń koronavirýs juqtyrǵany tirkeldi, dep habarlaidy "Ult aqparat".
BQO sanitariialyq-epidemiologiialyq baqylaý departamenti basshysynyń orynbasary Nurlybek Mustaevtyń óńirlik kommýnikatsiialar qyzmeti alańynda ótken brifingide málim etkenindei, sonyń ishinde 205-inde aýrý belgileri bolǵan. Qalǵan 298-inde aýrý belgileri joq.
Osy merzimde aýyrǵandardyń 360-y nemese 71,5 paiyzy Oral qalasynyń úlesine tiedi. Sondai-aq Báiterek aýdanynda – 63, Bórlide – 32, Terektide – 12, Shyńǵyrlaýda – 10, Jánibekte – 8, Qaztalovta – 7, Jańaqalada – 6, Syrymda – 4, Qaratóbede – 3, Bókei ordasy men Aqjaiyqta bir-birden adamnyń kovid juqtyrǵany belgili boldy.
Qarasha aiynda memlekettik shekaradan 12074 adam ótse, sonyń 2267-si – jolaýshylar. Anyqtamasyz ótken 224 jolaýshynyń tórteýinen indet tabyldy. Halyqaralyq júk tasymaldaýmen ainalysatyn 4022 júrgizýshiniń 1844-inde anyqtama bolmaǵan. Solardyń ishinen 17-siniń koronavirýs juqtyrǵany anyqtaldy.
Oblys boiynsha COVID-19 juqtyrǵandar sany 7527-ge jetip, sonyń 6961-i saýyǵyp shyqty. 128 adam kóz jumdy.
Óńirde monitoringtik toptar óz qyzmetin jalǵastyrýda. Qarasha aiynda 52 nysannyń sanitarlyq talapty buzǵany anyqtaldy. QR Ákimshilik quqyqbuzýshylyq kodeksiniń 425-baby 1-bóligine sáikes 80 hattama toltyrylyp, 4 mln astam teńge aiyppul salyndy.
«Oblysta 10 qarashadan bastap karantindik shekteý sharalary qatańdatylǵany málim. Túngi saǵat 23.00-den bastap tańǵy 06.00-ge deiin kólikterdiń qozǵalysyna shekteý qoiylýy, senbi, jeksenbi kúnderi sanitarlyq posttardyń jumys isteýi jáne qoǵamdyq kólikterdiń toqtatylýy siiaqty sharalar qazirgi turaqsyz jaǵdaiǵa bailanysty qolǵa alyndy. Epidemiologiialyq ahýaldyń ońalýy úshin turǵyndar sanitarlyq talaptardy saqtap, maska kiip, araqashyqtyqty umytpai, kópshilik jinalǵan jerlerge barmaýy kerek», dedi N.Mustaev.
