Batys Qazaqstan oblysynda 2022 jyldyń birinshi kúni úsh jol apaty tirkeldi. Apattan alty adam qaitys boldy, ishinde kámeletke tolmaǵan bir bala bar. Taǵy birneshe adam zardap shekti, - dep habarlaidy Tengrinews.kz tilshisi.
Oral-Atyraý tasjolynda bir jol apaty boldy. Oqiǵa saldarynan bala zardap shekken, ol komada jatyr.
Ekinshi jol apaty Samara-Shymkent tasjolynyń 313-shaqyrymynda boldy, Toyota Prado men Vaz 2112 soqtyǵysty. Oqiǵa saldarynan 4 adam qaitys boldy, zardap shekkender aýrýhanaǵa tústi.
Úshinshi oqiǵa Derkól aýyly mańyndaǵy ainalma jolda boldy. Hyundai Santa Fe men Volkswagen Polo avtokólikteri soqtyǵysty. Jol apaty saldarynan aýrýhanaǵa barar jolda esin jimastan 9 jastaǵy bala kóz jumdy.
"Oqiǵa ornynda politsiia qyzmetkerleri jumys isteidi. Oqiǵanyń sebebi men mán-jaiy anyqtalyp jatyr. Bul derekke qatysty Qylmystyq kodekstiń 345-baby "Kólik quraldaryn basqaratyn adamdardyń jol qozǵalysy nemese kólik quraldaryn paidalaný erejelerin buzýy" boiynsha sotqa deiingi tergeý bastaldy", - dep málimdedi BQO Politsiia departamenti ókili.
Politsiia qyzmetkerleri júrgizýshilerden eldi mekenderden tys jerlerge shyqpaýdy suraidy. Óńirde burqasyn men kóktaiǵaqqa bailanysty eskertý jariialandy.
