Astanada Telegram arqyly qyzdarmen tanyspaq bolǵan úsh er adamdy urlap, bopsalaǵan úsh adam 7 jyldan 8 jylǵa deiin bas bostandyǵynan aiyryldy. Sot úkimi zańdy kúshine endi, dep habarlaidy ult.kz.
Astana prokýratýrasynyń málimetinshe, sottalǵandar Telegram jelisinde qyzdardyń atynan jalǵan akkaýnttar ashyp, er adamdardy kezdesýge shaqyrǵan.
Alaida kezdesýge kelgen azamattardy kúshtep qala syrtyna alyp ketip, uryp-soqqan. Sondai-aq olar jábirlenýshilerdi ózderine qatysty kompromat videolardy jariialaimyz dep qorqytqan.
Osylaisha, qylmyskerler úsh jábirlenýshiden 2,2 million teńge alǵan. Olardyń birin mikroqarjy uiymynan nesie rásimdeýge májbúrlese, ekinshisiniń kóligin tartyp alǵan.
Sotta memlekettik aiyptaýshy kúdiktilerdiń kinásin tolyq dáleldegen. Nátijesinde úsh adam adam urlaý jáne bopsalaý qylmystary úshin kináli dep tanylyp, 7 jyldan 8 jylǵa deiingi merzimge bas bostandyǵynan aiyryldy. Jábirlenýshilerdiń keltirilgen shyǵyndy óteý týraly azamattyq talaptary da qanaǵattandyryldy.
Prokýratýra azamattardy áleýmettik jeliler men messendjerlerde tanysý kezinde saq bolýǵa shaqyrdy. Vedomstvonyń eskertýinshe, aýyrlatatyn mán-jailar kezinde adam urlaý jáne bopsalaý qylmystary úshin múlikti tárkileýmen birge 12 jylǵa deiin bas bostandyǵynan aiyrý jazasy qarastyrylǵan.
