BQO-nyń «Syrym» ótkizý beketinde tyiym salynǵan meditsinalyq taýarlar tielgen 14 júk kóligi ustaldy, dep habarlaidy "Ult aqparat".
BQO boiynsha memlekettik kirister departamenti túsindirý jumystary basqarmasynyń basshysy Aiman Qýanovanyń málim etkenindei, atalmysh júk kólikteri Almaty qalasynan Reseidiń Penza oblysyna bara jatqan.
Júk bólikterin qaraý kezinde shetke shyǵarýǵa tyiym salynǵan taýarlar, atap aitqanda, jeke qorǵanys quraldary, meditsinalyq, qorǵaný jáne respiratorlyq maskalar, dárilik zattar, bailanyssyz termometrler, qolǵaptar, qorǵanys kózildirikteri, qorǵaý kostiýmderi, respiratorlyq maskalarǵa arnalǵan súzgiler, antiseptikter, qorǵanys shetkalary tabyldy.
Sonymen qatar eksportqa shyǵarý úshin ruqsat berý qujattary joq meditsinalyq qural-jabdyqtardyń da bar ekendigi anyqtaldy.
A.Qýanovanyń sózine qaraǵanda, zańdy tulǵa meditsinalyq taýarlardy ótkizýge qajetti ruqsat berý qujattaryn bermegen. E-litsenziialaý aqparattyq júiesinde de málimetter joq bolyp shyqty.
Júk qujattaryna monitoringi júrgizý barysynda elektrondyq shot-faktýralardyń QR Qarjy ministrligi Memlekettik kirister komitetiniń EShF aqparattyq júiesinde tirkelmegeni belgili boldy. Sondyqtan usynylǵan qujattar jalǵan bolyp tabylady.
Taýarlardyń jalpy somasy 950 mln teńgeden asady.
«Atalǵan derekter zańdy tulǵanyń qoldan jasalǵan elektrondy shot-faktýralaryn usyný arqyly naqty alynǵan kiristerdi jasyrý jáne salyq tóleýden jaltarý nieti bolǵandyǵyn kórsetedi. Materialdar protsessýaldyq sheshim qabyldaý úshin BQO boiynsha ekonomikalyq tergeý departamentine berildi. Ónim jetkizýshige qatysty kedendik tekserý bastaldy», dedi A.Qýanova.
