Batys Qazaqstan oblysynda ótken jyldan beri 860,3 myń gektar aýyl sharýashylyǵy jeri paidalanylmai kelgen. Bul týraly oblys ákimi Ǵali Esqalievtiń tóraǵalyǵymen ótken aýyl sharýashylyǵy jerlerin tiimdi paidalaný máselesine arnalǵan selektorlyq keńeste aityldy, dep habarlaidy "Ult aqparat".
Oblys ákiminiń birinshi orynbasary Muhtar Mankeevtiń jiynda málim etkenindei, sonyń 75,1 myń gektary memleket menshigine qaitaryldy.
Osynyń ishinde 25,8 myń gektary jańa jer paidalanýshylarǵa berildi. Sondai-aq sharýalar 125,4 myń gektar jerdi igerýge kiristi. Al 659,8 myń gektar jerdi qaitarý baǵytynda jumystar júrgizilýde.
«Qazirgi tańda QR Aýyl sharýashylyǵy ministrligi paidalanylmai jatqan jerlerge salyq salý mólsherin kezeń-kezeńmen kóterý, jer telimderin qaitarmaýǵa bolatyn merzimdi qysqartý, ǵaryshtyq monitoringke kóshý boiynsha zańnamalarǵa tiisti ózgertýler engizý máselelerin qarastyrýda. Jańa zań jobasy kúshine ense, jerdi tiimdi paidalaný baǵytyndaǵy jumystar jandana túsetin bolady. Oblysta aýyl sharýashylyǵy jeriniń jalpy kólemi 7 mln 040 myń gektar bolsa, sonyń 542 myńy – egistik, 5527 myńy – jaiylymdyq, 450 myńy – shabyndyq, 462 myńy – tyńaiǵan jerler. Degenmen 1991 jylǵy esepke qaraǵanda, óńirde 12,9 mln gektar aýyl sharýashylyǵy jeri bolǵan. Kóptegen jer teliminiń qorda turǵany anyqtaldy. Osy kórsetkishti qalpyna keltirý baǵytynda aýqymdy jumys júrgizilýde», dedi M.Mankeev.
Keńeste sonymen qatar 2019 jyldyń qyrkúiek jáne jeltoqsan aiynda óńir basshysy Ǵali Esqalievtiń tóraǵalyǵymen ótken jiyndarda aýyl sharýashylyǵy jerlerin qaitarýǵa qatysty aýdan ákimderine berilgen tapsyrmalardyń birqatary oryndalmaǵany da aityldy.
Oblys prokýrorynyń aǵa kómekshisi Azamat Tileýbaevtyń sózine qaraǵanda, tek ótken jyldyń ózinde kadastrlyq quny 9 mlrd astam teńgeni quraityn jalpy kólemi 1130 myń gektar 2,5 myńnan astam jer teliminiń igerilmei jatqany belgili boldy. Prokýrorlyq qadaǵalaý aktilerine sáikes quny 700 mln astam teńgeni quraityn 108 myń gektar 221 jer telimi memleket menshigine qaitaryldy. Quny 3,6 mlrd teńge 749 myń gektar jer (1153 telim) igerile bastaldy. Jer kodeksiniń 94-babyna sáikes kadastrlyq quny 1,9 mlrd teńgege baǵalanǵan 67 myń gektardy quraityn 344 jer telimine qatysty uiǵarym qabyldanyp, aýyrtpalyq salyndy.
Biylǵy birinshi toqsanda prokýratýra aktilerine sáikes Bókei ordasy, Bórli, Syrym, Tasqala jáne Báiterek aýdandarynda quny 80 mln teńgeden asatyn 18664 gektar jer qaitaryldy.
Keńeste oblys ákimi Ǵali Esqaliev aýyl sharýashylyǵy jerlerin tiimdi paidalanbai otyrǵan agroqurylymdar tizimin jariia etý qajettigin, sonymen qatar jer telimin qosalqy jaldaýǵa berýdiń zańsyz ekendigin atap kórsetti.
«Kei sharýalar «Birlesken qyzmet týraly shart» jasaý arqyly qosalqy jaldaýǵa berip otyrǵan áreketin jasyrady. Tipti jalǵan shart jasasyp, jerin jalǵa berý esebinen paida kórip otyrǵan iri sharýa qojalyǵy ieleri de bar. Munyń bárin zań júzinde retteýge týra keledi. Al jerdi igerý barysynda qiyndyqqa tap bolǵan, aitalyq, qural-jabdyǵy kemshin, sý kózinen tapshylyq kórip otyrǵan sharýalarǵa qoldaý kórsetiledi. Salyq inspektsiiasy mamandary jerdi tiimdi paidalanbai otyrǵan agroqurylymdarǵa on eselengen kólemde salyq salatyn bolady. Taiaýda «Geoaqparattandyrý» portaly iske qosylyp, agroqurylymdar jumysy spýtnik arqyly baqylanyp, kózboiaýshylyqqa barǵandar áreketi áshkerelenedi. Jiynda aitylǵan usynys-tilekter jinaqtalyp, zańnamaǵa ózgerister engizý máselesi Úkimet nazaryna jetkiziletin bolady», dedi Ǵ.Esqaliev.
