Batys Qazaqstan oblysynda 4,5 tonna pishen men eki qora órtendi, dep habarlaidy QazAqparat.
BQO TJ departamentiniń baspasóz qyzmeti málim etkenindei, oqiǵa 18 sáýir kúni Shyńǵyrlaý aýdanynda boldy.
Saǵat 13.08-de Ashysai aýyldyq okrýgi Myrzaqora eldi mekeninde, órt sóndirý beketinen 30 shaqyrym jerde 4,5 tonna pishen men eki sharýashylyq qurylysy otqa orandy.
Aýmaǵy 225 sharshy metrdi quraǵan órt saǵat 14.10-de oqshaýlandy. Qazirgi kezde órt sóndirilip jatyr.
Departament málimetine qaraǵanda, sondai-aq búgin saǵat 17.00-de Samara-Shymkent joly boiynda Terekti aýdany Uzynkól aýyly tusynda avtokólik órtenip ketti.
Oral qalasynda saǵat 16.07-de Almaty kóshesi 109/1-mekenjaiynda 5 qabatty úide órt boldy. Birinshi qabattaǵy páterde jeke zattar jandy. Oqiǵa ornynan páter iesi, 62 jastaǵy er adam qutqarylyp, aýrýhanaǵa jatqyzyldy.
Saǵat 16.32-de sóndirilgen bul órt aldyn ala boljam boiynsha otpen abai bolmaýdan shyqqan.
