Batys Qazaqstan oblysynda 2,4 tonna balyqty zańsyz tasymaldaǵan eki avtokólik ustaldy, dep habarlaidy "Ult aqparat".
BQO politsiia departamentiniń baspasóz qyzmeti málim etkenindei, atalǵan qylmys «Bekire» jedel aldyn alý is-sharasy aiasynda anyqtaldy.
Oral-Atyraý joly boiynda Aqjaiyq aýdany Aqsýat aýyly mańynda 1976 jylǵy júrgizýshi aidap kele jatqan «Gazel» avtokóligi toqtatyldy. Ol 1298 kg qara balyqty zańdy qujattarsyz alyp kele jatqan.
Sondai-aq 14 sáýir kúni saǵat shamamen 20.00-de Terekti aýdany Podstepnyi aýylynda salynyp jatqan úidiń aýmaǵynda 1991 jylǵy júrgizýshiniń avtokóligi ustaldy. Bul avtokólikten tiisti qujattary joq 1 168 kg qara balyq shyqty.
Tárkilengen balyq pen ýyldyryq «Kaspii Ýral» JShS-na saqtaýǵa tapsyryldy.
Qazirgi kezde eki oqiǵa boiynsha QR QK 196-baby 1-bóligine (kórineý qylmystyq jolmen tabylǵan múlikti iemdený nemese ótkizý) sáikes sotqa deiingi tergeý amaldary júrgizilýde.
