Qaztalov aýdandyq sotynyń úkimimen 227 dana kiik múiizin satpaq bolǵan turǵyndar sottaldy, dep habarlaidy "Ult aqparat".
Qaztalov aýdandyq politsiia bólimi málim etkenindei, Jánibek aýdany Kúigenkól aýylynyń turǵyndary Bekbolat Jumaqaev pen Baqytjan Qajyǵaliev QR QK 339-baby 2-bóligi 2-tarmaǵyna sáikes aiypty dep tanylyp, múlikterin tárkileýsiz, árqaisysy úsh jyl merzimge bas bostandyqtarynan aiyryldy.
Sonymen qatar olar bes jylǵa deiin ańshylyq qyzmetpen ainalysa almaidy.
Sot talqysynda belgili bolǵanyndai, atalǵan turǵyndar 2019 jyldyń qarashasy men biylǵy sáýir aiy aralyǵynda Kúigenkól men Qaztalov aýdany Tereńkól aýyldyq okrýgi shekarasynda ornalasqan Ashyózek ózeni boiyna birneshe ret baryp, ólip jatqan kiikterdiń múiizin kesken.
Barlyǵy 227 dana múiizdi jinap, Kúigenkól aýyly mańyndaǵy shuńqyrda jasyryn saqtaǵan. Sodan keiin 22 sáýir kúni kezdesip, aldyn ala sóz bailasyp, múiizderdi qapqa salyp, satý maqsatymen B.Jumaqaev aidaǵan «Folksvagen Golf-2» avtokóligimen Qaztalov aýdany Qoshankól aýyldyq okrýgine qarasty Qarasý qystaǵyna tasymaldaǵan. Sol jerde politsiia qyzmetkerleriniń qolyna túsken.
Sot májilisinde B.Jumaqaev pen B.Qajyǵaliev ózderine taǵylǵan aiypty tolyq moiyndap, qylmys jasaǵandaryna ókinip, qatań jazalamaýdy surady.
Sottalýshylardyń áreketterinde kiikti naqty joiý jáne tabiǵatqa ziian keltirý deregi anyqtalmaǵandyqtan, jábirlenýshi memlekettik mekemeniń 464 mln 967,750 myń teńgeni materialdyq zalal retinde óndirý týraly azamattyq talaby qanaǵattandyrylmady.
Sot úkimi zańdy kúshine engen joq.
