BQO-da sý basý qaýpine bailanysty 109 eldi meken esepke alyndy, - dep habarlaidy Tengrinews.kz tilshisi "Habar 24" arnasyna silteme jasap.
Batys Qazaqstan oblysynyń ózenderinde áli de muz bar. Alaida eri bastaǵan kezde ózen alqaptarynda ornalasqan 109 eldi mekenge sý basý qaýpi tónedi. Sondai-aq, gidrotehnika qurylystarynda apat bolsa, olardy sý basýy múmkin. Jergilikti qutqarýshylar buǵan jol bermeý úshin muz kesý jumystaryn bastap ketken.
"Mundai jumystar sý tasqyny aldynda júrgiziledi. Erigen kezde sý tasqyny bolmaýy úshin mundai jumystar jyl saiyn júrgiziledi", - dedi qutqarý bólimshesiniń basshysy Nurmuhan Jumaǵaliev.
Maman oblystaǵy qar jamylǵysy qalypty, biraq jaýyn-shashyn deńgeii normadan joǵary ekenin aitty. Aýa temperatýrasy kúrt jylynyp ketse, qaýip tónýi múmkin.
"Búginde TJ Departamenti jergilikti atqarýshy organdarmen birlesip, kóktemgi kezeńde TJ aldyn alý boiynsha is-sharalar keshenin júrgizip jatyr. Barlyq jerde qar shyǵarylady. Shyǵarylǵan qar kólemi - 980 myń tekshe metr. Sý tasqyny áli de qaýip tóndirip tur, biraq búginde jaǵdai turaqty", - dep tolyqtyrdy BQO TJD basqarma bastyǵy Nuraly Mýsiev.
Naýryzdyń on kúninde BQO-da 33 millimetr jaýyn-shashyn jaýǵan. Naýryzdyń aiaǵynda kún jylynyp, sáýirdiń ortasynda ózenderde muz erýi múmkin.
