بقو-دا سۋ باسۋ قاۋپٸنە بايلانىستى 109 ەلدٸ مەكەن ەسەپكە الىندى, - دەپ حابارلايدى Tengrinews.kz تٸلشٸسٸ "حابار 24" ارناسىنا سٸلتەمە جاساپ.
باتىس قازاقستان وبلىسىنىڭ ٶزەندەرٸندە ەلٸ دە مۇز بار. الايدا ەري باستاعان كەزدە ٶزەن القاپتارىندا ورنالاسقان 109 ەلدٸ مەكەنگە سۋ باسۋ قاۋپٸ تٶنەدٸ. سونداي-اق, گيدروتەحنيكا قۇرىلىستارىندا اپات بولسا, ولاردى سۋ باسۋى مٷمكٸن. جەرگٸلٸكتٸ قۇتقارۋشىلار بۇعان جول بەرمەۋ ٷشٸن مۇز كەسۋ جۇمىستارىن باستاپ كەتكەن.
"مۇنداي جۇمىستار سۋ تاسقىنى الدىندا جٷرگٸزٸلەدٸ. ەرٸگەن كەزدە سۋ تاسقىنى بولماۋى ٷشٸن مۇنداي جۇمىستار جىل سايىن جٷرگٸزٸلەدٸ", - دەدٸ قۇتقارۋ بٶلٸمشەسٸنٸڭ باسشىسى نۇرمۇحان جۇماعاليەۆ.
مامان وبلىستاعى قار جامىلعىسى قالىپتى, بٸراق جاۋىن-شاشىن دەڭگەيٸ نورمادان جوعارى ەكەنٸن ايتتى. اۋا تەمپەراتۋراسى كٷرت جىلىنىپ كەتسە, قاۋٸپ تٶنۋٸ مٷمكٸن.
"بٷگٸندە تج دەپارتامەنتٸ جەرگٸلٸكتٸ اتقارۋشى ورگاندارمەن بٸرلەسٸپ, كٶكتەمگٸ كەزەڭدە تج الدىن الۋ بويىنشا ٸس-شارالار كەشەنٸن جٷرگٸزٸپ جاتىر. بارلىق جەردە قار شىعارىلادى. شىعارىلعان قار كٶلەمٸ - 980 مىڭ تەكشە مەتر. سۋ تاسقىنى ەلٸ دە قاۋٸپ تٶندٸرٸپ تۇر, بٸراق بٷگٸندە جاعداي تۇراقتى", - دەپ تولىقتىردى بقو تجد باسقارما باستىعى نۇرالى مۋسيەۆ.
ناۋرىزدىڭ ون كٷنٸندە بقو-دا 33 ميلليمەتر جاۋىن-شاشىن جاۋعان. ناۋرىزدىڭ اياعىندا كٷن جىلىنىپ, سەۋٸردٸڭ ورتاسىندا ٶزەندەردە مۇز ەرۋٸ مٷمكٸن.
