Batys Qazaqstan oblysynyń aýdandarynda koronavirýsqa qarsy egý jumystary bastaldy, dep habarlaidy «Ult aqparat».
BQO densaýlyq saqtaý basqarmasy basshysynyń mindetin atqarýshy Arman Qalibekovtiń málim etkenindei, óńirge ákelingen 1 myń doza aldymen meditsina qyzmetkerlerine egilýde.
Arman Talǵatulynyń sózine qaraǵanda, 1 aqpannan bastap Oraldaǵy alty qalalyq emhana men «Meditsinalyq ortalyq» JShS-da búginge deiin 240 adam reseilik «Gam-COVID-Vak» vaktsinasymen (Sputnik V) egilip úlgerdi.
«Alǵashqy kúnderde baiqalǵanyndai, vaktsina oń nátije berýde. Egilgen adamdardyń ózderiniń aitýynsha, olar jaisyz ózgeristi sezbegen. Inektsiia aýyrtpalyqsyz, azdap syzdaýmen ótýde. Dárigerler vaktsinatsiianyń arqasynda ǵana juqpaly indetke tosqaýyl qoiyp, burynǵy ómir saltymyzǵa qaita oralýǵa bolatynyn jaqsy túsinedi. Buǵan deiin Oraldaǵy meditsina qyzmetkerleri egilip jatsa, búgin osyndai ekpe jumystary Báiterek jáne Terekti aýdandaryndaǵy aýrýhanalarda bastaldy. Aldaǵy ýaqytta osylaisha jalǵasa beredi», dedi QazAqparat tilshisine A.Qalibekov.
Qazirgi tańda oblysta jeti juqpaly aýrýlar aýrýhanasynda 291, tórt karantindik statsionarda 26 adam emdelýde. 20 naýqas jansaqtaý bóliminde jatsa, solardyń tórteýi – 40-60, 14-i – 60-80 jas aralyǵyndaǵylar, ekeýi – 80-nen asqandar.
Sonyń ishinde 16 naýqas kovidke qosymsha júrek-qan tamyrlary aýrýlary, bireýi qant diabeti, taǵy bireýi revmatoidty artritke shaldyqqan.
Kúni búgin invazivti ókpeni jasandy jeldetý apparatyna 1, invazivti emes apparatqa 11, ottegi kontsentratoryna 11, ortalyqtandyrylǵan ottegi kózine 56 adam qosylǵan.
Eske sala keteiik, budan buryn Batys Qazaqstanda 240 adamnyń koronavirýsqa qarsy egilgenin, 31 mektepte 42 synyptyń karantinge jabylǵanyn jazǵan bolatynbyz.
