Búgin Úkimettiń baspasóz ortalyǵynda ótken baspasóz konferentsiiasynda ulttyq ekonomika vitse-ministri Ermek Alpysov «Biznestiń jol kartasy-2020» memlekettik baǵdarlamasy aiasynda elimizde shaǵyn jáne orta biznestiń damýy men kórsetiletin qoldaý sharalary týraly aityp berdi, dep habarlaidy "Ult aqparat" primeminister.kz portalyna silteme jasap.
«Biznestiń jol kartasy-2020» memlekettik baǵdarlamasynyń negizgi maqsattary – óńirlik kásipkerliktiń turaqty ári teńgerilimdi ósimin qamtamasyz etý, qazirgi jáne jańadan qurylatyn jumys oryndaryna qoldaý kórsetý.
Baǵdarlama iske asyrylǵan tórt jyldan beri respýblikalyq biýdjetten 210,5 mlrd teńge bólindi. Bul qarajat 13 myń ShOB sýbektisin qarjylandyrýǵa, orta eseppen jylyna 20 myń kásipkerdi oqytýǵa, 10 myń jumys ornyn qurýǵa, 3,3 trln teńge somasyna ónim shyǵarýǵa múmkindik berdi. Tólengen salyqtar somasy jyl saiyn 175 mlrd teńgeni qurady.
«Jalpy, baǵdarlama iske asyrylǵan tórt jylda respýblikalyq jáne jergilikti biýdjetterden 247,1 mlrd teńge kóleminde 13 380 jobaǵa qoldaý kórsetildi», — dep naqtylady ulttyq ekonomika vitse-ministri.
Bólingen qarajattyń basym bóligi nesieler boiynsha syiaqy mólsherlemesin sýbsidiialaýǵa baǵyttaldy (126 mlrd teńgesi nemese barlyq somanyń 60,1%). 53 mlrd teńgesi nemese 25,2% fabrikalarǵa, zaýyttarǵa jáne ShOB óndiristik nysandaryna jetkiliksiz infraqurylymdy júrgizýge baǵyttaldy. Qalǵan bóligi nesielerdi kepildendirýge, granttar usynýǵa, kásipkerlerdi oqytýǵa jáne olarǵa keńes berý qyzmetterine jumsaldy. Baǵdarlama tetikterine suranys óte joǵary.
Jalpy sharalar nátijesinde ShOB-tyń ekonomikadaǵy mańyzy artty. Máselen, 2015 jyly JIÓ-degi ShOB úlesi 24,9% qurasa, 2018 jyldyń qorytyndysy boiynsha 28,3% boldy. 2015 jylmen salystyrǵanda, shaǵyn jáne orta kásipkerlerdiń el ekonomikasyna qatysýy 3,4 paiyzdyq pýnktke joǵarylady.
2018 jyldyń qorytyndysy boiynsha ShOB-tyń ónimder shyǵarý kólemi 26 trln teńgeden asty. Bul rette, ónim shyǵarý qurylymynyń besten bir bóligi ónerkásiptiń úlesine tiesili.
Jalpy, 2018 jyly elimizde óndiris ósimi 2015 jylǵy deńgeiden naqty máninde 114% (nemese 26,5 trln teńgeni) qurady.
Al 2019 j. 1 qańtardaǵy málimetter boiynsha, shaǵyn jáne orta kásipkerlik sýbektileriniń sany 1,2 mln birlikti qurady. Ótken jyldyń osyndai kezeńimen salystyrǵanda, bul kórsetkish 8,3%-ǵa artty.
Sonymen qatar ulttyq ekonomika vitse-ministri E. Alpysov 2019 j. I toqsandaǵy shaǵyn jáne orta kásipkerliktiń damý qorytyndylary týraly aqparattandyrdy. Bul kezeńde barlyǵy 715 jobaǵa qoldaý kórsetildi.
Jergilikti atqarýshy organdar konkýrstyq rásimder qorytyndysy boiynsha osy jyldyń ekinshi jartysynda granttar bere bastaidy.
2019 jyly 15 infraqurylymdyq joba boiynsha 7,3 mlrd teńge qarastyrylǵan. Jobalar iske asyrylý satysynda.
«Biznestiń jol kartasy-2020» baǵdarlamasynyń mańyzdy baǵyty kásipkerlik áleýetti nyǵaitý bolyp tabylady. Bul baǵyt biznes júrgizý negizderine oqytý boiynsha jobalar keshenin, shaǵyn jáne orta biznes quzyretterin kóterýdi, áleýetti jáne óz isin bastaǵan kásipkerlerge qoldaý kórsetý úshin konsýltatsiialyq keńes berýdi qamtidy. Keńes berý kezinde biznes-jospardy qalai ázirleý, salyqtardy qalai tóleý, deklaratsiiany qalai tapsyrý, bankterge qalai júginip, litsenziiany qalai tapsyrý t.b. kerektigi túsindiriledi.
Osylaisha, jyl saiyn 20 myńǵa jýyq kásipker oqytylyp, quzyretteri arttyrylatyn bolady, orta eseppen alǵanda 154 myń kásipker jyl saiyn konsýltatsiialyq (110 myń) jáne servistik (44 myń) qyzmetter alatyn bolady.
Biylǵy jyldyń I toqsanynyń qorytyndysy boiynsha 6 135 tyńdaýshy biznes-mektepterde kásipkerlik negizderi boiynsha oqytýdan ótti. Kásipkerlerdi qoldaý ortalyqtarynda biznesti memlekettik qoldaý sharalary boiynsha 19,5 myń klinetke 36 myńnan astam keńes berildi, 7 myń kásipkerge 8 myńǵa jýyq servistik qyzmet kórsetildi.
Jalpy baǵdarlamanyń tujyrymdamasy jasalyp, onyń tyń baǵyttaryn aiqyndaityn jumys toby da qurylǵan.
«Biznestiń jol kartasy - 2020» baǵdarlamasyn 2025 jylǵa deiin uzartý sheńberinde tujyrymdama jasalyp, jumys toby quryldy. Onyń barlyq deńgeiin talqylap jatyrmyz. Qarjylyq qoldaý quraldaryn jetildirýge arnalǵan túzetýler jasaldy», - dedi Ulttyq ekonomika vitse-ministri Ermek Alpysov Úkimettiń baspasóz ortalyǵynda ótken brifingte.
Baǵdarlama sheńberinde kepildendirý úshin nesie kólemin ulǵaitý jolymen kepil boiynsha júktemeni azaitý, mikroqarjylyq uiymdardy tartý, ainalym qarajatyn nesieleý úlesin arttyrý, kásipkerlerdiń tiimdi jobalaryna talaptardy kúsheitý, memlekettik baǵdarlama jáne basqa da quraldardy ulǵaitý sharalary kózdelgen.
«Biznes-qaýymdastyqty belsendi qatysýǵa shaqyramyz. Barlyq usynystardy qarastyrýǵa daiynbyz. Bul sharalar memlekettik qoldaý men qarjylandyrý sharalarynyń qoljetimdiligin qamtamasyz etýge, sondai-aq onyń el ekonomikasyna úlesin arttyrýǵa múmkindik beretinine senimdimin», - deidi vitse-ministr.
