"Qazaqstandyq biznesmen Qairat Boranbaev ustaldy", - dep habarlady QazTAG pen Vlast.kz saittary.
QazTAG Boranbaevty qarjylyq monitoring agenttiginiń qyzmetkerleri ustap, tergeý izoliatoryna qamaǵanyn jazdy. Al Vlast.kz saitynyń dereginshe, Boranbaevtan Almaty qalasy qarjy monitoring departamenti jaýap alǵan.
Resmi organdar ázirge bul aqparatty rastamady da, joqqa da shyǵarǵan joq.
Qairat Boranbaev - eldiń eks-prezidenti Nazarbaevtyń qyzy Dariǵa Nazarbaevanyń burynǵy qudasy. Boranbaevtyń qyzy Alima Boranbaeva Dariǵanyń uly Aisultan Nazarbaevqa (2020 jyly qaitys bolǵan) turmysqa shyqqan. Keiin Aisultan men Alima ajyrasyp ketken.
Boranbaev Forbes Kazakhstan reitingi boiynsha, Qazaqstandaǵy eń bai elý biznesmenniń qataryna kiredi. Bailyǵy – 519 million dollar. Ol 2000-2002 jyldary "QazTransGaz" kompaniiasynyń atqarýshy direktory jáne "Intergas Central Asia" kommertsiialyq direktory, 2006-2014 jyldary "QazRosGaz" kompaniiasynyń bas direktory boldy.
Boranbaev – Almatynyń "Qairat" fýtbol komandasynyń iesi. Fitnation fitnes klýbynyń, "Rahat Palas", Comfort Hotel Astana qonaq úileriniń iesi, Esentai Mall, Esentai Tower biznes ortalyǵyn, "Almaly" saýda ortalyǵyn, Latviiadaǵy Jurmala Golf Club & Hotel qonaqúiin seriktesimen bólisip basqarady. McDonalds tamaqtaný ornynyń Qazaqstandaǵy jáne Reseidegi franchaizing iesi.
Onyń Britaniia, Chehiia, Reseide qymbat úileri bary da belgili bolǵan.
Boranbaev Qaraǵandydaǵy farmatsevtikalyq keshenin de baqylaidy. Qazaqstan biligi "Spýtnik V" ekpesin Qaraǵandy farmkesheninde shyǵarý úshin 15 milliard 175 myń teńge bólgen.
Boranbaev jaily habar Nazarbaevtyń nemere inisi Qairat Satybaldyuly ustalǵan soń eki kúnnen keiin shyqty. 13 naýryzda jemqorlyqqa qarsy agenttik Satybaldyulyn shetelge ushpaq bolǵan jerinen ustaǵanyn habarlaǵan. 15 naýryzda sot Qairat Satybaldyulyn eki aiǵa qamaǵan. Ol "Qazaqtelekom" kompaniiasynan asa iri kólemde aqsha jymqyrdy degen kúdikke ilindi.
