Búgin Májilistiń jalpy otyrysynda «QR-nyń keibir zańnamalyq aktilerine ekonomikalyq ósýdi qalpyna keltirý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
Atalǵan másele boiynsha negizgi baiandama jasaǵan QR Ulttyq ekonomika ministri Rýslan Dálenovtiń aitýynsha, zań jobasy Memleket basshysynyń «Jańa jaǵdaidaǵy Qazaqstan: is-qimyl kezeńi» atty Qazaqstan halqyna Joldaýy jáne Tótenshe jaǵdai jónindegi memlekettik komissiia aiasynda berilgen tapsyrmalaryn, sondai-aq Ekonomikalyq ósýdi qalpyna keltirý jónindegi keshendi josparda kózdelgen sharalardy iske asyrýǵa baǵyttalǵan. Usynylyp otyrǵan túzetýler 81 zańnamalyq aktige, onyń ishinde 14 kodeks pen 67 zańǵa 9 baǵyt boiynsha ózgerister men tolyqtyrýlar engizýdi kózdeidi.
«Investitsiialar tartý boiynsha investitsiia týraly kelisim dep atalatyn jańa qural engizý usynylady. Memlekettik-jekeshelik seriktestik tetikterin jetildirý jáne rásimderin ońtailandyrý kózdeledi. Kásipkerlikti jáne naqty sektordy damytý boiynsha biznes sýbektilerine qolaily jaǵdai jasaý úshin «Biryńǵai tereze» qaǵidatymen «Bizneske arnalǵan úkimet» veb-portalyn jáne biznes áriptesterdiń tizilimin engizý jónindegi tiisti fýnktsiialardy bekitý usynylady», - dedi ol.
Ministrdiń atap ótýinshe, tamaq jáne jeńil ónerkásip salalarynda jańadan qurylatyn nysandar úshin investitsiialar shegin 2 esege deiin tómendetý kózdelip otyr.
«Saýda saiasaty boiynsha sáikestikti baǵalaý salasyndaǵy akkreditteý boiynsha túzetýler usynylady. Bul rette akkreditteý jónindegi organǵa akkreditteý shemalaryn, tizilimderdi reglamentteý jónindegi quzyretter bekitiledi. IT salasyndaǵy eksportty damytý maqsatynda shyǵyndardyń bir bóligin óteý úshin aqparattyq-kommýnikatsiialyq tehnologiialar salasyndaǵy ónimder tizbesin keńeitý usynylyp otyr», - dedi Rýslan Dálenov.
