QR BǴM vitse-ministri Aslanbek Amrin Astanada «Ǵylym men biznesti biriktirý quraly retinde tehnologiialardy kommertsiialandyrý» forýmynda qazaqstandyq ǵalymdardyń jumysyndaǵy kemshilikterdi atap ótti, dep habarlaidy QazAqparat tilshisi.
«Álem biotehnologiia, internet-taratý, tsifrlandyrý, jasandy intellekt, neirojeli turǵysynda áldeqaida alǵa basyp ketti. Al Qazaqstandy aldaǵy ýaqytta ne kútip tur? Ǵylymdaǵy búgingi basty trend - jasandy intellektti barlyq salaǵa, sonyń ishinde ǵylymǵa da engizý bolyp otyr. Máselen, biz áleýmettik jeli men mobildi qosymshany qoldana otyryp, kóptegen múmkindikterge ie boldyq. Munyń barlyǵyn búgin neirojeliler júzege asyrady», - deidi ol.
Vitse-ministrdiń aitýynsha, aldaǵy ýaqytta zerthanashylar jumys istep júrgen jerde neirojeliler jumys atqaratyn bolady. Erte me, kesh pe bul úrdistiń keletinin aitqan ol keleshekte keibir personal tek aqparattyń kózi bolyp qana qalýy múmkin ekenin aitady.
«Eń bastysy jańa óndiristik tóńkeris kezindegidei jumys oryndarynyń joǵalýyna daiyn bolýymyz kerek. 4.0 indýstriiasy dál osyǵan ákeledi. Oǵan daiyn bolýymyz kerek. Sizderdiń laborantaryńyz kúndelikti jasap júrgen zertteýler óte arzan bolyp qalýy yqtimal. Mashina básekege qabiletsiz ǵalymdardy ysyrýy múmkin. Sondyqtan, bul ózgeriske ǵalymdar daiyn bolýy tiis», - deidi ol.
Aslanbek Amrin qazaqstandyq ǵalymdardyń tek jasandy intellekt turǵysynan emes, ózge de salada artta qalǵanyn aitady.
«Qazirgi qoldanbaly ǵylymdaǵy ahýalǵa, iaǵni sheteldik jáne qazaqstandyq patentterge kóz júgirteiik. 2016 jyly bizdiń otandyq patenttiń satylýynan bar-joǵy 1 million AQSh dollary ǵana túsken. Biz sizderge myqtylarmen teńesýdi usynamyz», - deidi vitse-ministr.
Onyń aitýynsha, Qazaqstan dinamikalyq turǵyda damyp kele jatqanymen, innovatsiia, ǵylymi maqalalar, biznespen jumys turǵysynan kórsetkish álemdik trendterge qaraǵanda joǵary deńgeide emes.
«BAQ tarapynan biletinderińizdei, bizdiń ǵalymdardy feiktik jýrnaldarǵa maqala jariialaý turǵysynan tipti alaiaqtar aldap ketedi. Bul ǵalymdar men ǵylymnyń deńgeiin kórsetedi. Qurmetti ǵalymdar! Biz bárimiz de kóptegen salada bir orynda turyp qaldyq. Ǵylymi alǵa jylý degenniń ne ekenin umytyp kettik. Bizde ǵylymi alǵa jyljý joq. Álemdik bazalarǵa bir ret kóz júgirtýdiń ózi jetedi. Ózgeris kerek. Barlyq trendter men basymdyqtar Elbasynyń «Rýhani jańǵyrý» baǵdarlamasynda aitylǵan. Saiasi jiger bar. Jospardy sizdermen birge atqaryp, alǵa basý kerek», - deidi vitse-ministr.
Aslanbek Amrin ǵylymi turǵyda nátije joq bolǵannan keiin halyqtyń bul salaǵa senimi azaiyp, memleket tarapynan biýdjetten bólinetin aqsha azaiǵanyn jetkizdi.
