Sýret: Aqorda
Memleket basshysy «Qazaqstan jáne orta derjavalardyń róli: qaýipsizdikti, turaqtylyq pen ornyqty damýdy ilgeriletý» atty taqyrypta dáris oqydy, dep habarlaidy Aqordanyń baspasóz qyzmeti.
Memlekettik sapar aiasynda Qasym-Jomart Toqaev 46-shy Singapýr lektsiiasyn oqydy. Prezident jahandyq qaýipsizdikti, turaqtylyq pen ornyqty damýdy qamtamasyz etý isindegi orta derjavalardyń atqaratyn róli týraly oi-pikirimen bólisti.
1980-jyldardan beri Iýsof Ishak institýty (ISEAS) uiymdastyryp kele jatqan Singapýr lektsiialary – akademiialyq toptar, saiasatkerler, diplomattar men jas ǵalymdar úshin memleketter basshylary men álemdik deńgeidegi kórnekti saiasatkerlerdiń ustanymdaryn tikelei tyńdaýǵa múmkindik beretin alań.
Qasym-Jomart Toqaev sharaǵa qatysýshylarǵa iltipat bildire otyryp, óziniń ómir jolynda Singapýrdyń airyqsha máni bar ekenin atap ótti.
"Men kóp jyl buryn osy elde jas diplomat retinde qyzmet ettim. Osynaý asqaq rýhty memlekettiń tamasha tabys jolynan jańylmai kele jatqanyn óz kózimmen kórý úshin Singapýrǵa taǵy da kelgenime qýanyshtymyn. Eldiń negizin qalaýshy Li Kýan Iýdiń kóregen kóshbasshylyǵymen júrgizilgen Singapýrdaǵy áigili ekonomikalyq ózgerister, shyn máninde, memlekettiń irgesin nyǵaitýdyń jáne ekonomikalyq ósimge qol jetkizýdiń jarqyn úlgisine ainaldy. Sizderdiń elińiz Qazaqstandy damý men órkendeý baǵytynda ózindik jol tańdaýǵa jigerlendiredi. Rasynda, Singapýrda ótkizgen jyldarymda tabandylyq pen jańashyldyqty úirendim. Bul qasietter qazirgidei qubylmaly álemde Qazaqstannyń keleshegi týraly paiymymnyń qalyptasýyna áser etti", – dedi Prezident.
Memleket basshysy elimizdegi qoǵamdyq-saiasi ózgerister jóninde aita kelip, «Ádiletti Qazaqstan» jáne Premer-ministr Loýrens Vong usynǵan «Alǵa, Singapýr» baǵdarlamalarynyń maqsattary men qaǵidattary uqsas ekenine nazar aýdardy.
"Qos qujat ta halyqtyń qamyn birinshi orynǵa qoiady jáne eldiń igiligin árbir azamat sezinýge tiis degen qaǵidatty ustanady. Aýqymdy ulttyq transformatsiia – ońai úderis emes. Biraq qansha qiyn bolsa da, biz bul strategiialyq baǵytymyzdan ainymaimyz. Byltyr ekonomikalyq ósim 5,1 paiyzǵa artty. Biz JIÓ mólsherin 2029 jylǵa qarai eki ese, iaǵni 450 milliard dollarǵa deiin jetkizýge niettimiz. Osy asqaq maqsatqa jetý úshin biz bilim men innovatsiiaǵa negizdelgen zamanaýi ekonomikanyń irgesin qalap, jyl saiyn 6 paiyz ósimdi qamtamasyz etýge tiispiz. Biz Singapýr siiaqty biznes, qarjy, daryndylar men innovatsiia shoǵyrlanatyn senimdi ortalyqqa ainalýǵa umtylamyz", – dedi Qazaqstan Prezidenti.
Qasym-Jomart Toqaev Qazaqstanda investitsiialyq saiasat jáne ekonomikany ártaraptandyrý baǵytynda júrgizilip jatqan jumystar jóninde aitty.
Onyń pikirinshe, geografiialyq alshaqtyqqa, jer kólemi men tarihyndaǵy aiyrmashylyqtarǵa qaramastan, Qazaqstan men Singapýrdyń kóptegen qundylyqtary ortaq ári uqsas syn-qaterlermen betpe-bet kelip otyr.
"Biyl qańtar aiynda Germaniianyń halyqaralyq qatynastar jáne qaýipsizdik institýty alǵash ret Qazaqstandy álemniń orta derjavalarynyń sanatyna qosty. Singapýrlyqtar ózderin kishkentai el sanaitynyn jaqsy bilemin. Alaida, meniń oiymsha, Singapýrdyń qarjylyq jáne ekonomikalyq yqpaly, strategiialyq turǵydan asa mańyzdy halyqaralyq teńiz joldarynyń toǵysynda ornalasýy, 2024 jylǵy Global Firepower esebi boiynsha 145 eldiń ishinde 30-orynǵa taban tireýi bul memlekettiń orny áldeqaida joǵary ekenin kórsetedi. Buǵan qosa, strategiialyq oi-sana men tiimdi diplomatiia Singapýrdy Shyǵys pen Batys arasyndaǵy mańyzdy kópirge ainaldyrdy", – dedi Memleket basshysy.
