Qazaqstan jańa álemde óziniń laiyqty ornyn alýǵa tiis. Bul týraly Qazaqstan halqyna Joldaýyn jariia etken QR Prezidenti Qasym-Jomart Toqaev aitty, dep habarlaidy "Ult aqparat".
«Biz qazirgi qiyndyqty mindetti túrde eńseremiz. Degenmen elimizdiń jańa geosaiasi ahýaldaǵy uzaqmerzimdi damýyn esten shyǵarmaýymyz kerek. Qazir álem sońǵy 100 jyl ishinde bolmaǵan daǵdarysty bastan keshirýde. Sarapshylardyń aitýynsha, jahandyq ekonomikany qaita qalpyna keltirý úshin keminde 5 jylǵa deiin ýaqyt qajet. Dei turǵanmen bolashaqta kósh bastaityn memleketterdiń básekege qabileti dál osyndai daǵdarystar men kúrdeli ózgerister kezinde shyńdalady. Qazaqstan jańa álemde óziniń laiyqty ornyn alýǵa tiis», - dedi Memleket basshysy.
QR Prezidentiniń atap ótýinshe, Tuńǵysh Prezident – Elbasy Nursultan Nazarbaevtyń kóregen saiasatynyń arqasynda ekonomikanyń damýy úshin berik negiz qalandy. Álemdik arenada abyroi-bedelge ie boldy.
«Sondyqtan álemniń jańa bolmys-bitimi qalyptasyp jatqan shaqta biz reformalarǵa tyń serpin berýimiz kerek. Bul baǵytta ult josparyn jáne 5 institýtsionaldyq reformany negizgi baǵdar etip alýymyz qajet. Biz azamattarymyzdyń laiyqty ómir súrýine jaǵdai jasaýǵa, olardyń quqyqtaryn qorǵaýǵa, zań ústemdigin qamtamasyz etýge, jemqorlyqqa qarsy kúresti kúsheitýge mindettimiz», - dedi Qasym-Jomart Toqaev.
