Ekijaqty kezdesý men Joǵary deńgeidegi strategiialyq yntymaqtastyq keńesiniń 4-otyrysynan keiin Memleket basshysy Qasym-Jomart Toqaev pen Túrkiia Prezidenti Rejep Taiip Erdoǵan buqaralyq aqparat quraldary úshin brifing ótkizdi, dep habarlaidy "Ult aqparat" Aqordanyń resmi saityna silteme jasap.
Memleket basshysy Túrkiia Prezidentiniń memlekettik sapary eki el arasyndaǵy diplomatiialyq qatynas ornaǵanyna 30 jyl tolǵan mereili mejemen tuspa-tus kelip otyrǵanyn atap ótti.
– Biz baýyrlas Túrkiia elimen turaqty memleketaralyq qatynas ornattyq. Biyldyń ózinde joǵary deńgeidegi birneshe sapar boldy. Birqatar mańyzdy qujatqa qol qoiyldy. Meniń mamyr aiynda Túrkiiaǵa memlekettik saparmen barǵanymdy bilesizder. Sol kezde Rejep myrza ekeýmiz keńeitilgen Strategiialyq áriptestik týraly birlesken málimdeme qabyldadyq. Túrkiia – Qazaqstannyń óte mańyzdy strategiialyq seriktesi, – dedi Prezident.
Memleket basshysy Rejep Taiip Erdoǵannyń eki el arasyndaǵy yntymaqtastyqty damytýǵa qosqan úlesin joǵary baǵalaitynyn aityp, Túrkiianyń jahandyq jáne aimaqtaǵy problemalardy sheshýge belsendi qatysyp otyrǵanyna toqtaldy.
Sonymen qatar Qasym-Jomart Toqaev Joǵary deńgeidegi strategiialyq yntymaqtastyq keńesiniń 4-otyrysy nátijesinde birqatar úkimetaralyq qujatqa qol qoiylǵanyn habarlady.
Prezidenttiń aitýynsha, ekijaqty saýda-ekonomikalyq jáne investitsiialyq yntymaqtastyq – bizdiń bailanystarymyzdyń ózegi. Sondyqtan aldaǵy ýaqytta eki el arasyndaǵy saýda ainalymyn 10 milliard dollarǵa jetkizý kózdelip otyr.
Budan bólek, Memleket basshysy búgingi kezdesý barysynda kólik-tranzit salasyndaǵy yntymaqtastyqtyń damý perspektivasyna nazar aýdardy.
– Transkaspii halyqaralyq kólik baǵdary arqyly tasymaldy ulǵaitýǵa eki el de múddeli. Óńirdegi turaqtylyqty saqtaý úshin bul strategiialyq jobanyń zor mańyzy bar. Biyl 7 aida osy baǵyt arqyly tasymaldanatyn júk kólemi 2,5 esege artyp, 1 million tonnaǵa jetti. Osy rette, memleketterimizdiń «Orta dálizdi» damytýy qazir óte mańyzdy, – dedi Memleket basshysy.
Kelissózder barysynda jahandyq ózekti máseleler de nazardan tys qalmady. Prezident kóptegen halyqaralyq máseleler boiynsha eki eldiń ustanymy jaqyn ekenin atap ótti.
– Biz kópjaqty diplomatiiany odan ári nyǵaitýǵa erekshe mán beremiz. Eki eldiń seriktestigi Birikken Ulttar Uiymy, Túrki memleketteri uiymy, Aziiadaǵy ózara is-qimyl jáne senim sharalary jónindegi keńes siiaqty kópjaqty qurylymdar aiasynda oidaǵydai damyp keledi. Erteń Túrkiia Prezidentimen birge Aziiadaǵy ózara is-qimyl jáne senim sharalary jónindegi keńestiń 6-shy Sammitine qatysamyz, – dedi Memleket basshysy.
Óz kezeginde Túrkiia Prezidenti Qazaqstanǵa jasaǵan memlekettik saparynyń nátijesine kóńili tolatynyn jetkizdi.
– Biz baýyrlas Qazaqstannyń egemendigin, territoriialyq tutastyǵyn, beibitshiligi men turaqtylyǵyn árdaiym qoldaimyz. Bizdiń birligimiz ben yntymaqtastyǵymyz máńgilik! Qazaqstan Prezidentiniń basshylyǵymen júrgizilip jatqan reformalardy joǵary baǵalaimyn. Aldaǵy Prezident sailaýynyń qorytyndysy Qazaqstanǵa igilik ákelsin, – dedi Rejep Taiip Erdoǵan.
Túrkiia Prezidenti I dárejeli «Dostyq» ordenimen marapattaǵany úshin Qasym-Jomart Toqaevqa shyn júrekten alǵys aitty.
