Elordanyń irgesi alǵashqy jyldary qalai qalanǵany týraly Qazaqstan Prezidenti Nursultan Nazarbaev «Kazahstanskaia pravda» gazetine bergen suhbatynda aityp berdi, dep habarlaidy QazAqparat tilshisi.
«Jańa astananyń irgesin qalaýda qarjylandyrý kózin tabý - eń kúrdeli sharýalardyń biri boldy. Aqsha bolsa - is te alǵa júredi. Búkil abyroidy salýǵa týra keldi. Aqmola erkin ekonomikalyq aýmaǵyn qurý arqyly belgili bir somany jinap aldyq. Keńes odaǵynan qalǵan materialdyq rezervterdi de iske qostyq. Bul qor álbette az emes edi - olar metall men temir quimasynan, qurylys materialdarynan turatyn. Onyń ishinen Qazaqstanǵa qajetti bóligin ǵana qaldyryp, qalǵanyn satyp jiberip, odan túsken 20 million dollardy elorda qoryna aýdardyq. Jalpy, biz Astanany turǵyzarda biýdjetke salmaq túsirmeýge tyrystyq. Árbir teńge esepke alynyp, artyq shyǵynnyń bolmaýyn qadaǵaladyq», - deidi Nursultan Nazarbaev.
Prezident óz sózinde qurylysty qarjylandyrýdyń basty kózi - investitsiialar bolǵanyn aitady.
«Biz sheteldik investorlardan 10 jyl merzimge paiyzsyz nesie alýǵa qol jetkizdik. Sonymen qatar, kóptegen nysandar granttar men ótemaqysyz investitsiialarǵa salynǵan», - deidi Qazaqstan Prezidenti.
Osylaisha, Aqorda quny 22 million dollarlyq Ábý-Dabi damý qorynyń granty esebinen boi kótergen. «Nur Astana» meshiti - Katar memleketiniń 15 million dollarlyq grant esebininen turǵyzylsa, quny 33 million dollarlyq «Astana-Taýer» ortalyǵyn Túrkiia qarjylandyrǵan. Qazirgi Aýyl sharýashylyǵy ministrliginiń ǵimaraty Kýveit grantynyń esebinen salynsa, al Saltanat saraiyn Oman ámiri syiǵa tartqan. «Alataý» sport kesheni munai salasyndaǵy investorlardyń tartýy. Mundai ǵimarattar álbette az emes. Birikken Arab Ámirlikterinen, Saýd Arabiiasynan, Italiia, Japoniia men ózge de elderden granttardyń aǵyny kelip jatty. Ǵimarattardyń kóbin sheteldikter Qazaqstan halqyna, Prezidentke syi retinde tabys etken.
«Bizdiń azamattar da aitarlyqtai úlgi kórsetti. Osy jerge kelgennen keiin men aqmolalyq kásipkerlerdi jinap alyp, olardan qalaǵa syilyq jasaýdy suradym. Asqar Máminge osyǵan deiin satylyp alynǵan «Máskeý» qonaq úiin memleketke qaitarý týraly usynys jasadym. Keiin biz osy ǵimaratqa Syrtqy ister ministrligin kirgizdik. Ondaǵan iegerler ózderiniń kottedjderin tapsyryp, ol jerlerge intelligentsiia ókilderi men sheneýnikterdi ornalastyrdyq. Basqa amal joq ta edi. Qalada záýlim degen ǵimarattardyń sany sanaýly bolatyn. Oiyn-saýyq baǵytyndaǵy nysandar múlde joq bolatyn», - deidi Nursultan Nazarbaev.
.jpeg)