Foto: parlam.kz
Qazaqstannyń eńbek naryǵyn damytý jáne kadrlyq áleýetin nyǵaitý taqyrybyndaǵy Úkimet saǵatynda Áleýmettik-mádeni damý komitetiniń tóraǵasy Ashat Aimaǵambetov jumyspen qamtý baǵdarlamalary tiisti nátije bermei jatqanyn aitty, dep habarlaidy Ult.kz.
"2008 jyldan beri jumyspen qamtýdyń 5 baǵdarlamasy qabyldandy, iaǵni eki jyl saiyn jańa baǵdarlama qabyldanyp otyrǵan. Olar qandai nátije berdi? Eger jumyspen qamtý sharalaryn negizgi quraldary men ádister arqyly taldaityn bolsaq, onda olar osy jyldar boiy kontseptýaldy túrde aitarlyqtai ózgermegenin jáne negizinen ýaqytsha sipatta bolǵanyn baiqaimyz. «Baiaǵy jartas – sol jartas». Biz áli kúnge deiin «tizesi shyqqan» sharalardy qoldanamyz. Jańa júieli sharalar az. Sol baiaǵy ýaqytsha jumys oryndaryn qurý, oqytý jáne qaita oqytý, shaǵyn nesie berý, infraqurylymdyq jobalardy iske asyrý jáne t.b. Al jergilikti deńgeide bul sharalar qoǵamdyq jumystarǵa tartýdan, áleýmettik jumys oryndaryn usynýdan jáne jastar praktikasynan asa almaidy. Osy sharalardyń qanshalyqty tiimdi ekendigin de zerttep jatqan eshkim joq", - dedi A.Aimaǵambetov.
Ashat Aimaǵambetov Úkimettiń esebine sáikes, jyl saiyn shamamen 900 myń adam jumysqa ornalasatynyn, alaida jumyssyzdyq deńgeii áli de ózgerissiz qalyp otyrǵanyn nazarǵa aldy.
"Mynanadai temppen jumyssyzdyq pen ózin-ózi jumyspen qamtý máselesi áldeqashan sheshilýi kerek edi ǵoi. 2023 jyldyń qorytyndysy boiynsha 963 myń adam jumysqa ornalastyrylǵan eken, al biraq jumyssyzdardyń sany nebári 445 myń adam bolǵan. Buǵan deiin eńbek naryǵyna jyl saiyn 200 myń adam keletin, al qazirgi ýaqytta bul kórsetkish 250 myńǵa jetip qaldy, al 5 jyldan keiin 350 myńǵa deiin barady deidi. Osylaisha 2030 jylǵa qarai eńbek naryǵyna úlken qysym jasalady. Munyń barlyǵy júielik problemalardyń bar ekendigin kórsetedi", - dep qosty ol.
Tóraǵanyń aitýynsha, buǵan vedomstvolyq bytrańqylyq sebep. Ekonomikany – Ulttyq ekonomika ministrligi josparlasa, jumyspen qamtýdy – Eńbek ministrligi, bilim berýdi – joǵary bilim men Oqý-aǵartý ministrligi josparlaidy, iaǵni biryńǵai úilestirilgen jumys pen saiasat joq.
"Jumyspen qamtýǵa kelsek, barlyq jumys oryndarynyń 70%-yn nemese jalpy jumyspen qamtýdyń 50 paiyzyna jýyǵyn biznes emes, memleket qamtamasyz etip otyr. Iaǵni Memlekettik qoldaý sharalaryna, trilliondaǵan nesie jáne trilliondaǵan salyqtyq jeńildikke qaramastan, jeke kásiporyndar men jeke kásipkerler tek 2,8 million jumys ornyn nemese jumyspen qamtýdyń 33 paiyzyn ǵana qamtamasyz etip otyr. Iaǵni, jumyspen qamtýdyń negizgi generatory - memleket.
Memlekettik baǵdarlamalardyń jumys oryndaryn ashýdaǵy tiimdiligi óte tómen. Statistika boiynsha, kóptegen baǵdarlamalarda bekitilgen kórsetkishter tekqaǵaz júzinde qalyp qoiǵan.
Ulttyq jobalar búgingi tańda sapaly jumys oryndaryn jetilikti dengeide qamtamasyz etpei otyr. Jalpy, zańnamalyq deńgeide jańa óndiris ashatyn nemese investitsiialyq jobany iske asyratyn barlyq tulǵalar úshin mindetti túrde jumys oryndaryn qurý, sondai-aq jergilikti jastardy oqytý jáne jumysqa ornalastyrý talaptaryn bekitý qajet dep sanaimyz, dál osyǵan faktorǵa bailanysty olarǵa salyqtyq jeńildikter men preferentsiialar berý máselesi qarastyrylýy tiis", - dep usyndy A.Aimaǵambetov.
Ashat Aimaǵambetov investorlarmen sapaly jumys oryndaryn qurý, dýaldy oqytý jáne bilim transferti boiynsha ózara mindettemeler qajet ekenin aitty.
