Elordada Bas múfti Naýryzbai qajy Taǵanulynyń tóraǵalyǵymen ótken Qazaqstan musylmandary dini basqarmasynyń keńeitilgen tóralqa májilisinde biylǵy pitir sadaqasynyń, zeket pen pidiianyń mólsheri anyqtaldy, dep habarlaidy "Ult aqparat" muftyat.kz-ke silteme jasap.
Biyl pitir mólsheri 420 teńge bolyp belgilendi. Pitir sadaqanyń mólsheri 2 keli unnyń ortasha baǵasymen esepteldi. Al unnyń baǵasy QMDB-nyń qala jáne oblys ókildikteriniń bergen málimeti negizinde anyqtaldy.
QMDB Ýaǵyz-nasihat bóliminiń meńgerýshisi Batyrjan Mansurov taraýyq namazynda sanitarlyq talaptardy saqtai otyryp qysqa súreler oqý, aýa raiy qolaily aimaqtarda meshit aýlasynda ótkizý, Ramazan aiynda Quran hatym jasaityn toptar quryp, jamaǵatty saýapty isterge jumyldyrý jaǵyna basymdyq berý týraly aitty. Sondai-aq Batyrjan Mansurov qasietti aida onlain jáne tikelei efirde birneshe joba usynylatynyn jetkizdi.
