QR Premer-Ministri Asqar Maminniń tóraǵalyǵymen ótken Úkimettiń kezekti otyrysynda 2019 jyldyń qańtar-qazan ailaryndaǵy áleýmettik-ekonomikalyq damý qorytyndylary jáne respýblikalyq biýdjettiń oryndalýy máseleleri qaraldy. Biylǵy 10 aidaǵy áleýmettik-ekonomikalyq damý qorytyndylary týraly QR ulttyq ekonomika ministri Rýslan Dálenov baiandady, dep habarlaidy "Ult aqparat" primeminister.kz saityna silteme jasap.
QR UEM málimetteri boiynsha, JIÓ ósimi qańtar-qazan ailarynda 4,4%-ǵa jedeldedi. Ekonomika ósiminiń faktorlary — investitsiialyq belsendilik, ishki suranystyń jáne JIÓ-degi shaǵyn jáne orta biznes úlesiniń ulǵaiýy, ónerkásiptiń kishi salalaryndaǵy eki mándi ósim, sonymen birge, munai óndirýdiń qalpyna kelýi. Ekonomikanyń salalary boiynsha investitsiialyq jobalar pýly quryldy. Bul orta merzimdi keleshekte ekonomikanyń turaqty jáne sapaly ósý negizin quraidy.
«Investitsiialar 8,2%-ǵa ósti. Halyqtyń naqty tabysynyń ósýi 6,4%-dy qurady. Jalpy ishki ónimdegi shaǵyn jáne orta biznestiń úlesi 28,5%-ǵa deiin artty. Ónerkásip óndirisi ornyqty ósý úrdisin saqtap otyr. Qańtar-qazanda ósim 3,5%-dy qurady. Óńdeý ónerkásibi 3,3%-ǵa ósti», — dedi R. Dálenov.
Ósý negizgi óńdeý salalarynda qol jetkizilgen qarqynnyń saqtalýymen qamtamasyz etildi. Olar — jeńil ónerkásip, mashina jasaý, farmatsevtika jáne sýsyndar óndirisi.
«Munai óndirýdi qalpyna keltirý esebinen ken óndirý ónerkásibinde ósim 3,7%-ǵa deiin artty. Tústi metaldar kenin óndirýde 18% deńgeiinde joǵary ósý qarqyny saqtaldy. Qurylys jumystary qarqyndy júrgizilýde. Ósim 12,7%-dy qurady. 9,8 mln sharshy metr turǵyn úi paidalanýǵa berildi», — dedi ulttyq ekonomika ministri.
Aýyl sharýashylyǵy salasynda mal sharýashylyǵy ónimderiniń óndirisi 3,9%-ǵa ulǵaidy. Kórsetiletin qyzmetter salasynda ósim 4,4%-dy qurady. Saýda kólemi 7,5%-ǵa, kólik – 5,6%-ǵa jáne bailanys – 4,5%-ǵa ósti.
R. Dálenovtyń aitýynsha, biylǵy qańtar-qyrkúiekte syrtqy saýda ainalymy 1,5%-ǵa ósip, $70,4 mlrd deiin jetti. Eksport kólemi – $42,7 mlrd, al import $27,6 mlrd qurady. Negizgi kórsetkishter boiynsha óńirlerdiń kóbinde ósýdiń oń serpini baiqalady.
«Qurylys jáne negizgi kapitalǵa salynǵan investitsiialar boiynsha artta qalǵan óńirler sany qysqardy. Máselen, Soltústik Qazaqstan oblysy qurylys boiynsha 3,9% deńgeiinde, Mańǵystaý oblysy investitsiialar boiynsha 2,9% deńgeiinde oń ósim kórsetti. Shyǵys Qazaqstan jáne Qyzylorda oblystary 4 kórsetkish boiynsha, Qaraǵandy, Batys Qazaqstan jáne Aqmola oblystary 3 kórsetkish boiynsha joǵary ósim kórsetti», — dep túiindedi R. Dálenov.
