QR Parlamenti Májilisiniń depýtaty Aibek Paiaev taý-ken salasyn ákimshilendirý sharalaryn qaita qaraýdy usyndy, dep habarlaidy QazAqparat.
Májiliste «QR Ulttyq qorynan 2022-2024 jyldarǵa kepildendirilgen transfert týraly» QR zańyna ózgeris engizý týraly» Zań jobasy qaralyp jatyr.
Jiyn barysynda BAQ ókilderine suhbat bergen Májilis depýtaty Aibek Paiaev naqtylanǵan biýdjettiń shyǵys bóligi, jalpy alǵanda, oryndy degep pikir aitty.
«Biýdjettiń shyǵys jaǵy ulǵaiyp jatqanyn bilesizder. Onyń naqty sebepteri bar. Qańtardyń basynda Prezident birneshe tapsyrma berdi. Joldaýynda da aityp ketti. Osy tapsyrmanyń bárin júzege asyrý úshin qomaqty qarajat bólinip otyr. Biýdjettiń shyǵys bóligi 2,7 trln teńgege ulǵaidy desek, onyń ishinde Ulttyq qordan qosymsha 1 trln 636 mlrd teńge bólinip jatyr. Árine, úlken aqsha. Onyń bári eldegi turaqtylyqty saqtap, memleket ekonomikasynyń ári qarai damýyna úles qosýǵa, óńirlerdi damytyp, eń basty másele, bul qarajattyń bári halyqqa tolyǵymen jetýi kerek. Sondai-aq, keleshekte salyq bazasyn keńeitý arqyly Ulttyq qorǵa qaityp túsýi kerek», - dedi ol.
Depýtat keleshekte Ulttyq qorǵa qol jaia bermes úshin fiskaldyq saiasatty qaita qaraý kerek degen paiym aitty.
«Men Ulttyq ekonomika ministrligine suraq qoiyp otyrmyn. Keleshekte salyq bazasyn ulǵaitý arqyly, jalpy taý-ken salasyndaǵy ákimshilendirýdi sapaly júzege asyrý arqyly, sol jerdegi salyqtyq júktemeni qaita qaraý arqyly biýdjetke qomaqty qarajat túsirýge bolady. Biz ony mindetti túrde isteýimiz kerek. Óitkeni biyl fiskaldyq organdar respýblikalyq biýdjettiń kiris bóligin 955 mlrd teńge artyǵymen oryndaýy kerek», - dedi Aibek Paiaev.
