Almaty oblysyndaǵy shaǵyn jáne orta bizneste 110 myń sýbekti, olarda jumys isteitinderdiń sany 11% ósip, 248 myń adamǵa jetti. Osy salada óndirilgen ónim men kórsetilgen qyzmet kólemi 1 trln. teńgeniń ainalasynda, olardan 75 mlrd. teńge salyq túsip, onyń jergilikti biýdjettegi úlesi 37-den 43%-ke ósti. Oǵan qosa ShOB-nyń biylǵy jyly 12 myń jumys ornymen 100 jańa nysany ashylatyn bolady. Bul tsifrlyq kórsetkishter oblys ákimi A. Batalovtyń esep berý jiynynda aityldy.
- Elbasynyń Joldaýyn júzege asyra otyryp, biz biylǵy jyly kásipkerlik salasynda qýaty ártúrli 100 nysan ashýdy kózdep otyrmyz. Sóitip ShOB-dan túsetin salyq kólemin 45%-ke deiin jetkizbekpiz. Sonyń nátijesinde shaǵyn jáne orta bizneste 12 myń azamat jumyspen qamtylatyn bolady. Bul óz kezeginde ózin ózi jumyspen qamtyǵan azamattardyń edáýir bóligin jumysqa ornalastyrýǵa jáne olardyń jumyspen qamtylǵandar arasyndaǵy úlesin 30-dan 25%-ke tómendetýge jaǵdai jasaidy, - dedi A. Batalov.
Almaty oblysynda kásipkerlikti damytýdyń múmkindikteri mol. 2017 jyly memlekettik qoldaý kólemi 9,3 mlrd. teńgeni qurady. Biylǵy jyly «Biznestiń jol kartasy – 2020», «Nátijeli jumyspen qamtý jáne jappai kásipkerlikti damytý» baǵdarlamalary aiasynda jáne «Damý» qory arqyly 7,9 mlrd. teńge qarastyryldy. Oblystyń barlyq aýdan ortalyqtarynda «bir tereze» qaǵidatymen jumys isteitin Kásipkerlerge qyzmet kórsetý ortalyǵy ashylatyn bolady. Qazir mundai ortalyqtar Taldyqorǵan, Tekeli qalalarynda jáne Eskeldi aýdanynda bar.
