Qazaqstan musylmandary dini basqarmasy Tóralqa májilisiniń sheshimimen biyl bir adam atynan beriletin pitir sadaqa mólsheri 370 teńge kóleminde bekitildi.
Elimizdegi tótenshe jaǵdaiǵa bailanysty Ramazan aiynda beriletin pitir sadaqasy men zeketti kaspi.kz mobildik qosymshasy arqyly aýdarýǵa bolady.
QMDB jáne bank basshylyǵy arasynda jasalǵan kelisimge sáikes, bul joba qasietti Ramazan aiynda júzege aspaq. Búginde ortaq jobanyń qosymsha jumystary qaldy. Jumys tolyq aiaqtalǵan soń jaqyn kúnderde onlain-sadaqa berý jobasy iske qosylady. Bul týraly alda qosymsha habarlanady.
«Mobildik qosymshaǵa ár oblys pen respýblikalyq mańyzy bar qalalardaǵy ortalyq meshitterdiń esepshoty engiziledi. Ár azamat óz óńirindegi meshittiń esepshotyna pitir sadaqa men zeketti úiden shyqpai onlain rejimde aýdara alady. Aita ketsek, QMDB Tóralqa májilisiniń sheshimimen biyl bir adam atynan beriletin pitir sadaqa mólsheri 370 teńge dep bekitildi. Pitir sadaqanyń quny eki keli unnyń respýblika boiynsha eseptegende naryqtyq ortasha baǵasymen shyǵaryldy. Al materialdyq jaǵdaiy bar azamattar pitir sadaqany meiiz nemese qurma qunymen bergeni abzal», - dep habarlady QMDB-dan.
Óz qajettigin qospaǵanda mal-múlki, dúniesi kúmis nisabyna jetken, iaǵni 127 myń teńgesi bar adam Ramazan aiynda ózi jáne januiasy úshin pitir sadaqasyn berýi – ýájip (mindet). Pitir sadaqasy pendeniń oraza kezinde jiberip alǵan qate-kemshilikteriniń óteýi úshin jáne kómekke muqtaj jandardy materialdyq qoldaý maqsatynda beriledi.
Biyl qasietti Ramazan aiy 24 sáýirde bastalady. Tótenshe jaǵdaiǵa bailanysty juqpaly indettiń aldyn alý úshin meshitterde juma, taraýyq, kúndelikti jamaǵat namazdary ýaqytsha oqylmaidy. Sonymen qatar, meshit pen qoǵamdyq oryndarda aýyzashar berilmeitin boldy.
