Biyl elimizdegi barlyq mektep beinebaqylaýmen jáne jyly dárethanamen qamtamasyz etilýi tiis. Bul týraly QR Bilim jáne ǵylym ministrliginiń keńeitilgen alqa otyrysynda vedomstvo basshysy Ashat Aimaǵambetov aitty, – dep habarlaidy QazAqparat.
«Memleket basshysynyń bilim berý uiymdaryn beinebaqylaýmen jáne tiisti jabdyqtarmen qamtamasyz etý týraly tapsyrmasy qazir oryndalyp jatyr. Biraq, desek te búgingi kúni biraz problama bar. Búginde 1 227 mektep jáne 1 628 balabaqsha beinebaqylaý júiesimen jabdyqtalmaǵan. Al jabdyqtalǵan balabaqsha men mektepterdiń sapasyn qaraityn bolsaq, bizde biraz suraq bar. Bilim jáne ǵylym, Ishki ister ministrlikteri bekitken buiryq bar. Sol buiryqta barlyq másele qarastyrylǵan. Ol video baqylaý kameralary neshe kún jazý kerek, ol qai jerde ornalastyrylýy kerek, sapasy qandai bolýy kerek degen máseleniń barlyǵy jazylǵan. Biraq, búginde óńirler ony oryndamai otyr. Bul - balalardyń qaýipsizdigine tikelei bailanysty másele. Sondyqtan, Úkimettiń keńeitilgen otyrysynda Memleket basshysy taǵy bir márte tapsyrma berdi», - dedi ol.
Osy rette ministr qyrkúiek aiyna deiin respýblikadaǵy barlyq mektep pen balabaqshany beinebaqylaýmen qamtamasyz etý kerektigin aitty.
«Jyly dárethanamen qamtamasyz etý máselesi elimizdegi mektepterdiń úshten birinde problema bolyp tur. Tek dala dárethanasy bar mektepterdiń eń kóbi Túrkistanda - 541, sondai-aq, Almatyda, Almaty oblysynda, Shyǵys Qazaqstan, Jambyl, Batys Qazaqstan, Aqtóbe, Qaraǵandy jáne Qyzylorda oblystarynda da kóp. Bul máseleni de biyl tolyq sheshý qajet»,- dedi Ashat Aimaǵambetov.
