Biyl Qazaqstannan Reseige taýar eksporty 15,1 paiyzǵa ósti, - dep habarlaidy Tengrinews.kz agenttigi.
2022 jyldyń 9 aiynda QR men RF arasyndaǵy saýda 18,4 milliard AQSh dollaryn qurady, bul ótken jyldyń sáikes kezeńinen 1 milliard artyq (17,5 mlrd AQSh dollary). Mundai derekterdi Qazaqstan men Reseidiń XVIII óńiraralyq yntymaqtastyq Forýmynyń plenarlyq otyrysynda Premer-ministrdiń orynbasary - QR saýda jáne integratsiia ministri Serik Jumanǵarin keltirdi. Resei 36 paiyz úlesimen (12.4 milliard AQSh dollary) Qazaqstanǵa importtyq jetkizilimderde basymdyq tanytýda.
Resei Federatsiiasy Qazaqstannyń strategiialyq saýda-ekonomikalyq áriptesteriniń biri bolyp tabylady. Reseige eksport 15,1 paiyzǵa ósip, 5,9 milliard AQSh dollaryn qurady.
Sondai-aq, Serik Jumanǵarin sarapshylardyń baǵalaýy boiynsha Qazaqstannyń Reseige 180 taýar pozitsiiasy boiynsha shamamen 1 milliard AQSh dollary somasyna eksport kólemin ulǵaitý múmkindigi bar ekenin atap ótti.
Óńirler bólinisinde Reseimen saýda qatynastaryn Abai, Ulytaý, Pavlodar jáne Qostanai oblystary belsendi damytýda, olardyń taýar ainalymy 2,7 milliard AQSh dollaryna jetti. Jalpy, Resei men Qazaqstannyń syrtqy saýda ainalymyndaǵy shekara mańy oblystarynyń saýda úlesi 2022 jyldyń 6 aiynda 37,7 paiyz nemese 4,4 milliard AQSh dollaryn qurady.
2021 jyldyń qorytyndysy boiynsha Qazaqstan men RF arasyndaǵy taýar ainalymy 24,6 milliard AQSh dollaryn qurady, bul 2020 jylǵy kórsetkishten 31,2 paiyzǵa artyq (18,8 milliard AQSh dollary).
